La’o Hamutuk

Bulletin  |  Surat Popular  |  Radio Igualdade  |  Topic index  |  Reports  |  Updates
Reference  |   Presentations  |  Mission Statement  |  LH Blog  |  Search  |  Home

Maternus Bere hetan akuzasaun ba Krime Grave Kontra Umanidade iha Masakre Igreja Suai no atividade Milisia Laksaur seluk tan

Hetan kaer husi PNTL, hafoin husik fila-fali ba Indonezia husi Lider Politiku Timor-Leste

9 Desembru 2009.  Atualiza Setembru 2010.

Link to English version of this page

Ligasaun ba dokumentu balun relevante (foun liu uluk, iha lingua Tetum maske bainhira dehan lingua seluk)

 

Iha selebrasaun tinan sanulu Timor-Leste nia vota ba independensia, Nasaun foun ne'e nia lider sira viola konstituisaun atu atinje de'it Indonezia nia hakarak. Pajina ne'e sumariza informasaun no dokumentu sira kona-ba hasai ilegalmente Maternus Bere, lider milisia Suai ne'ebe hetan akuzasaun ona ba Krime Grave Kontra Umanidade, inkluindu Masakre Igreja Suai loron 6 Setembru 1999.

Semana ida tuirmai, iha aniversariu tinan sanulu masakre ne'e, ema sira halibur hamutuk iha Embaizada Indonezia nia oin hodi komemora eventu ne;e no ezije katak Maternus Bere hatama ba iha julgamentu iha Timor-Leste.

Hanehan iha ligasaun ne'e ba dokumentu referensia, no atu haree foto boot liu. Liga ba artigu balun husi media iha lian Tetum kona-ba asuntu ne'e.  (Artigu depois 20 Setember iha ne'e.) (mos Ingles).

Idea Jeral

Durante tinan 1999, Maternus Bere (uza mos naran "Motornus") maka hanesan Komandante Milisia Laksaur Suai ne'ebe teroriza ema iha area ne'eba, inkluindu oho ema sivil la ho kilat nain 30 resin no amo-lulik nain tolu iha Igreja Suai iha loron 6 Setembru 1999. Hanehan iha ne'e ba CAVR nia deskripsaun ba Masakre Igreja Suai (Bahasa ka Ingles), ka estudu kazu husi Geoffrey Robinson nia relatoriu East Timor 1999: Crimes against Humanity (Ingles).

 

SCU sumariza Akuzasaun Covalima:

Akuzasaun singular ba membru milisia Laksaur nain 14 inkluindu Egidio Manek, Vice Komandante milisia Laksaur iha Distritu Covalima no Komandante Milisia Laksaur Sub-distritu ho Krimes Graves Kontra Umanidade.

Akuzasaun ne'ebe fo ba arguidu sira ho krime graves kontra umanidade inklui exterminasaun, oho-ema, halo lakon ema, violensia, tortura, aktu inumanu, deportasaun no persekusaun ne'ebe halo hasoru populasaun sivil iha ditritu Covalima entre 27 Janeiru 1999 no 15 Dezembru 1999.

Iha akuzasaun ne'e inklui masakre Igreja Suai ne'ebe akontese iha loron 6 Setembru 1999. Entre Janeiru 1999 no Setembru 1999, ema sivil atus ba atus ba hela iha Igreja Ave Maria iha Suai tamba tauk kampaine teror no violensia husi soldadu TNI, Polisia no milisia. Iha loron 6 Setembru 1999, soldadu TNI , membru Polisia no milisia ataka ema sivil sira be la kaer kilat iha komplexu Igreja nia laran ne'ebe oho ema barak inklui amo-lunik nain tolu, ho naran Amo Hilario Mendonca, Amo Dewanto no Amo Franciso, feto no labarik sira. Isin-maten husi vitima sira lori ba Timor Osidental foin maka soe husi soldadu TNI, membru Polisia no milisia. Iha fulan Novembru 1999, isin-maten vitima nain 31 inkluindu amo-lulik nain totu, hetan husi Timor Osidental no lori mai Timor-Leste.

Akuzasaun ne'e mos akuza Egidio Manek, Vice Komandante Milisia Laksaur no Komandante Laksaur Subdistritu Maternus Bere, Pedro Teles, Hendrikus Mali no Cosmas Amaral hos sira ninia emar sira ba ataka ne'ebe boot no sistematiku ba populasaun sira iha Covalima. Ne'e inklui oho ema nain 14 ne'ebe maka pro independente iha Suco Laktos iha Covalima, oho-ema no halo lakon ema sivil nain 52 ne'ebe halo entre 12 Abril 1999 no 17 Otubru 1999 no turtura no aktu inumanu halo ona hasoru ema sivil nain 49 entre 27 Janeiru no 30 Otobru 1999. Vitima sira ne'e hotu pro independensia nia emar.

Akuzasaun mos akuza arguidu sira ba deportasaun ema sivil rihun ba rihun husi distritu Covalima ba Timor Osidental iha Republika Indonezia hafoin rezultadu konsultasaun popular fosai iha loron 4 Setembru 1999.

Arguidu sira iha akuzasaun ne'e hotu fiar katak sira hela iha Republika Indonezia. Mandadu Kapturasaun sei hetan husi Tribunal Distritu Dili ne'ebe sei haruka liu ba Atorneu Jeral Republika Indonezia. Mandadu kapturasaun sei mos haruka ba Interpol basa Timor-Leste hola parte iha organizasaun Interpol iha 2002.

Iha fulan Fevereiru 2003, UN/RDTL nia Unidade Krimes Graves fosai  Akuzasaun No/ 09/2003 (Ingles), akuza Egidio Manek, Maternus Bere no sira seluk "krime kontra umanidade: oho-ema, eksterminasaun, halakon ema, tortura, aktu inumanidade, violasaun ba feto, deportasaun no persekusaun." Mandadu kapturasaun fosai ona husi juizu Timor-Leste. Paragrafu 235 deskreve lori halai Juliana "Alola" dos Santos, naran ba Fundasaun Alola, husi igreja. Hanehan iha ne'e ba hetan analize legal kona-ba Bere nia responsabilidade ba Alola nia abduksaun.

Maske tribunal hasai ona mandadu kapturasaun no haruka ona ba governu Indonesian nomos sirkula ona husi Interpol, ema nain 300 resin husi 391 hetan akuzasaun husi Unidade Krime Graves, inkluindu  Maternus Bere, goza moris iha rai Indonezia. Bere moris livre los iha Timor Osidental. Hanehan iha ne'e ba haree La'o Hamutuk nia sumariu relatoriu no mekanizmu sira ne'ebe faila atu atinje justisa entre tinan 1999 no 2009 (mos iha Ingles).

Iha Agostu 2009, Amnesty International fosai relatoriu ida We Cry for Justice Impunity Persists 10 Years on in Timor-Leste ne'ebe bolu ba Konselu Seguransa UNO atu harii Tribunal Internasional ida ba Timor-Leste.

Maternus Bere hetan caer no liberdade

Iha inisiu fulan Agostu 2009, Maternus Bere tama mai iha Timor-Leste no rekoinesidu husi populasaun lokal iha Suai. Polisia Nasional Timor-Leste (PNTL) kaptura Bere iha loron 8 Agostu, no hafoin nia transfere kedas mai Prizaun Becora iha Dili hodi hein julgamentu.

Iha loron 30 Agostu, kuandu Timor-Leste selebra hela nia tinan sanulu referendum inedependensia, RDTL nia ulun-boot ilegalmente fo orden ba autoridade prizaun atu husik sai Maternus Bere ba iha Embaizador Indonezia nian  iha Timor-Leste. Tuir ami ninia hatene, nia sei nafatin iha Embaizada Indonezia ka rezidensia Embaizador nian iha Dili, hein atu transfere ba Indonezia, ne'ebe nia hetan ekspektasaun ona atu husik sai. Hassan Wirajuda, Ministru Negosio Estrajeiru Indonezia nian, rejeita atu ba Dili atende selebrasaun tinan sanulu too Bere hetan ona transfer ba kontrolu Indonezia nian.

La'o Hamutuk hetan informasaun katak desizaun atu husik sai Bere fosai katak motorizada husi Prezidente Jose Ramos-Horta no Primeiru Ministru Xanana Gusmăo, ho koopersaun laduun furak husi Ministra Justisa Lucia Lobato no ofisiais no funsionariu sivil iha intervensaun politika makaas ba sistema judisial. Juiz de'it maka bele legalmente hasai akuzadu ida husi prizaun, no laiha juiz maka hakarak atu hasai mandadu hanesan ne'e.

 Iha ninia palestra, Prezidente Jose Ramos-Horta hateten:

"Hanesan nasaun tomak hatene, hau nia pozisaun klaru no nafatin kona-ba asuntu ne'e: Hanesan Timor-oan no Xefe Estadu, hanesan ema ida ne'ebe lakon mane-maluk no feton ida, hanesan ema-ida ne'ebe besik lakon ninia moris, hanesan ema-ida ne'ebe ba-mai iha nasaun furak ne'e ninia laran durante tinan sanulu kotuk ne'e, no hatene saida maka povu barak sente no ezije ohin loron ne'e, hau hateten mai ita rai tiha pasaun ba kotuk. Iha ne'eba sei laiha Tribunal Internasional."

Ema Timor-oan parak maka la goza malae nia konfidensia no privileju ne'ebe permite La'o Hamutuk atu publikamente la konkorda ho Prezidente.

Felizmente, iha ne'eba iha data empiriku ne'ebe hatudu saida maka povu Timor-oan hanoin kona-ba justisa no impunidade ba krimes graves. Iha 2008, Fundasaun Asia halo intrevista ema nain 1,120 iha Timor-lara. Sira foin lalais publika relatoriu, "Peskiza ba Sidadaun nian Konsiensa no Atitude kona-bá Lei no Justisa 2008" (mos iha Ingles).  Tuir mai, fotisai husi pajina 41-42, kona-ba justisa no impunidade (inklui realsa):

Survey tinan 2004 no 2008 nian buka atu komprende diak liutan Timor-oan sira nia hanoin kona-ba punisaun no impunidade ba krime grave sira, espesifikamente kazu sira ne'ebe mak ema individual komete ona oho-ema. Enkuantu pergunta sira ne'ebe kestiona kona-ba ida-ne'e diferente uitoan entre survey rua ne'e: Timor-oan sira barak tebes mak fiar katak ema ida-idak ne'ebe komete ona oho-ema tenke hetan punisaun hotu kedas laiha egesaun. Iha tinan 2008 pursentu 90 husi Timor-oan sira mak hateten katak laiha instansia ruma ne'ebe mak ema individual ida ne'ebe komete ona oho-ema tenke bele atu evita punisaun ka selu kompensasaun ba vitima sira, enkuantu iha tinan 2004 nian pursentu 91 mak hateten katak ema ruma ne'ebe komete ona oho-ema tenke a komarka duke fo kompensasaun ka halo rua ne'e hotu.

Pregunta: Supoin ema balun komete oho-ema. Karik iIta boot hanoin katak iha tempu ne’ebé mak ema ne’e tenke bele atu ‘evita punisaun’ ka sai livre husi fó ‘kompensasaun’ ba vítima?

Resposta:   Lae 90%,  Loos, 'eviota punkisaun' 6%,   La hatene/Laiha resposta, 4%.

Mos iha 30 Agostu, Prezidente Jose Ramos-Horta fo palestra ekstensivu ida (Ingles) ba nasaun hanesan parte ida husi selebrasaun aniversariu. Maske nia la temin naran Bere, nia fosai katak "Sei laiha tribunal internasional" no husu Nasaun Unidas atu dezolve nia de'it prosesu justisa be iha Timor-Leste, Ekipa Investigasaun Krime Graves (Serious Crimes Investigation Team - SCIT).

Halo publiku nia laran-moras

Iha loron hanesan ne'ebe Bere hetan libertasaun, estudante nain tolu hetan kapturasaun ba organiza konferensia imprensa ne'ebe ezije ba justisa iha Hotel Timor nia oin. Sira hetan liberdade lahoo akuzasaun hafoin tau iha kadeia oras 72 nia laran.

Iha dadersan hafoin Bere fo fila ba Indonezia nia kontrolu, Delegasaun Prezidensial ida husi Estadus Unidus hasoru malu ketak ida ho Timor-Leste ninia Prezidente no Primeiru Ministru no foti preukupasaun kona-ba governu ninia aksaun kona ba justisa no akontabilidade ba krimes graves iha tinan 1999, inkluindu fo liberdade ba Bere.

Iha loraik ne'eba, aktivista solidaridade sira husi rai balu  hasoru malu ho Prezidente Jose Ramos-Horta iha ninia servisu fatin. Nia hateten katak kaer Maternus Bere bele hanesan kazu identidade salan ida, no la fo razaun seluk ba nia libertasaun ne'e.

Iha loron 31 Agostu, Porta-voz Sekretariu-Jeral ONU iha Nova Iorke mensiona katak husik-sai Bere iha konferensia imprensa loron-loron:

"...  Altu Komisariu ba Direitus Umanus buka daudaun klarifikasaun urjente relatoriu Martenus Bere, eis komandante milisia ne'ebe hetan alegasaun ba implikasaun iha masakre 1999 iha Timor-Leste, husik-sai ona iha loron Domingu husi autoridade Timor-Leste.

"Bere hetan alegadu ba ninia involvimentu ba lidera ataka ida ne'ebe mak rezulta minimu ema nain 40 oho-mate, inkluindu feto, labarik no amu-lulik sira, iha distritu ida iha Timor-Leste iha loron 6 Setembru 1999. Karik relatoriu ne'e los dunik, ninia libertasaun ne'e kontrariu ba rezolusaun Konseillu Seguransa ne'ebe uza hosi estabelese misaun ONU iha Timor-Leste no la hateke ba prinsipiu akontabilidade global ba krime hasoru umanidade.

"ONU nia pozisaun firme katak iha ne'eba labele iha amnestia ka impunidade ba krime graves hanesan krime funu, krime kontra umanidade no jenosida. Iha kontekstu ne'e, Altu nivel Komisariu ba Direitus Umanus makaas tebes lamenta aktu husik-sai ema ida ne'ebe mak naturalmente iha tiha ona mandatu kapturasaun."

Iha loron 1 fulan Setembru, UNMIT halo estetmentu inisiu ida:

"Nasaun Unidas nia pozisaun jeral -- no hanesan hateten beibeik ona husi Sekretariu Jeral -- maka la bele iha impunidade ba krimes graves hanesan krime kontra umanidade. Akontabilidade maka fundasaun importante atu konsolida regra direitu no protesaun direitus umanus ­ Ne'e ba husi liman ba liman ho harii dame no prosperiadade rohan laek. Pasu konkriu presiza atu halo hodi asegura akontabilidade tomak, hodi hatuka impunidade no fo reparasaun ba vitima bazeia ba standar no prinsipiu direitus umanus internasional.
   "UNMIT laiha pozisaun ida ne'ebe atu fo komentariu ba siskumtansia espesifiku kona-ba kazu Martenus Bere, nanu'u UNMIT laiha responsabilidade ba liu prizaun iha Timor-Leste eh laiha iha estajiu ne'e informasaun sufisiente kona-ba nia estatus."

Husi loron 2 too 4 fulan Setembru, vitima no familia vitima sira husi distritu 13 hotu iha Timor-Leste hasoru malu iha Dili hodi forma asosiasaun nasional foun. Populasaun sira husi nasaun tomak tanis ba justisa no ekspresa laran triste no laran moras ba lider sira ne'ebe sakrifika ona justisa no regra direitu ba interese diplomasia. Reprezentante husi Covalima (Suai) tenik filafilak husi oinsa sira bele esplika ne'e ba sira ninia vizinu no familia sira, maibe la hetan resposta ida be diak.

Iha loron 2 Setembru, Komisariu Altu UNO ba Direitus Umanus hakerek ona ba Prezidente Jose Ramos-Horta (ka Ingles) fosai ninia "preukupasaun profundu" ba dezisaun ba hasai Maternus Bere "ne'e ekstremamente lamentavel basa ida ne'e iha konsekuensia makaas ba prospektu akontabilidade ba krimes graves..."

Iha loron 4 Setembru, Amnesty International halo esteitmentu publiku ida: Timor-Leste: Faila atu prosesa lider milisia indikadu, reforsa nesesidade urgente atu harii tribunal internasional (mos Ingles).

Hanehan iha kualker foto hodi haree boot liutan.

Iha dader loron 6 fulan Setembru, aniversariu masakre Igreja Suai, ema lubuk oan ida hatais hena metan lori ai-funal no lilin ba iha Indonezia nia Embaizada iha Dili, fatin ne'ebe sira fiar katak Maternus Bere hela ba. Iha oras rua nia laran, mai tan ema nain 100 resin, hatoo sira nia orasaun, laran triste no hirus katak governu ne'ebe sira fiar ukun rasik an ona viola fali nia lei rasik no konstituisaun atu fo satisfasaun ba Indonesia ninia hakarak.

Iha loron hanesan, Sidadaun Timor-Leste nain 100 resin asina karta aberta ida ba sira ninia lider (ka Ingles) protesta libertasaun Bere nian no husi lider sira esplika ninia baze legal.

Iha Segunda-feira, loron 7 Setembru, libertasaun ba Bere sai  kontroversia ida iha Timor-Leste nia Parlamentu Nasional. Fretilin (Ingles) no PUN (mos Ingles) halo estetmentu, no Fretilin nia lao husik hela quorum no hapara sesaun parlamentaria nian.

Iha loron tuir mai, Parlamentu rejeita Prezidente Ramos-Horta nia pedidu atu halo viazen ba Estadus Unidus no Europa hodi protesta ninia involvimentu iha Bere ninia libertasaun. Komentariu husi Fretilin (Ingles).

Iha loron 9 Setembru, loron aniversariu masakre iha Estasaun Polisia Maliana, Prezidente hateten katak nia hakarak rezigna karik Parlamentu la muda sira ninia desizaun too loraik horas tuku 5:00. Sira sente presaun makaas, no Parlamentu aprova Prezidente nia pedido. Vota a favor 31, kontra 10, abstensoens 5, la vota 1 no iha liur 18. Iha loron hanesan, Tribunal be Rekursu no Konsellu Superior ba Majistratura Judisiál nia Prezidente Claudio de Jesus Ximenes halo konferensia pres atu esplika katak Konsellu Superior haruka tiha ona nia Inspetora Judisiál halo averiguasaun ba kazu ne'e, atu hatene iha duni libertasaun ilegál ba arguidu ne'ebé tribunal haruka hatama tiha ona iha kadeia. Tuir lei, ema foo-tulun ba arguidu ida ne'e atu halai sei hetan pena prizaun tinan 2 too tinan 6.

Iha loron 12 Setembru, ativista direitus umanus iha Jakarta fosai deklarasaun hamutuk (mos Ingles) atu husu justisa ba Maternus Bere no sira seluk ne'ebe komite crime iha Timor-Leste.

Iha loron 14 Setembru, organizasaun sociede sivil iha Timor-Leste fo sai deklarasaun hamutuk Lian Sosiedade sivil-nian kontra Intervensaun Governo no Presidente da Republika-nan ba Sistema Judisiariu (mos Ingles).

Iha loron 14 Setembru mos, deputadus Parlamentu Nasional husi bancada Fretilin no Kota hatama Mosaun Censura hasoru Governo AMP tamba sira dehan katak liberta Maternus Bere ilegal.

Iha loron 15 Setembru, UNMIT halo konferensia imprensa (Transcript, Ingles) atu lansa Relatóriu kona-ba Progresu Direitus Umanus iha Timor-Leste. Konklusaun komunikadu imprensa hateten: "Bainhira Timor-Leste komemora loron 30 fulan Agostu, buat oituan maka alkansa tiha ona hodi tau matan ba violasaun sira direitus umanus nian ne’ebé akontese entre tinan 1974 no 1999, maske investigasaun sira ba iha violasaun direitus umanus grave ne’ebé komete iha tinan 1999 kontinua hala’o. Iha pasu ida-ne’ebé viola Timor-Leste nia obrigasaun sira direitus umanus no minimiza esforsu sira atu hapara impunidade, lider Milísia Maternus Bere ne’ebé hasoru akuzasaun ba Krime Kontra Umanidade, hetan liberdade hosi detensaun pre-julgamentu no entrega ba autoridade sira Indonézia nian."

Debate ida ne'e kontinua iha semana proximo, ho diskusaun klean liu kona ba konsekuensia libertasaun Maternus Bere. Iha loron 24 Setembru, La'o Hamutuk organiza enkontro publiku ho titulu "Impaktu kazu Maternus Bere ba Sistema Justisa iha Estadu Direitu no Demokratiku." Ema nain ualunulu resin marka presensa, atu rona orador Fernanda Borges (Presidente Komisaun A Parlamentu Nasional), Luis Oliveira  (Direktor JSMP), Fernanda Guimaraes (Unidade Direitus Humanus no Justisa Tranzisional, UNMIT) no  Edio Saldanha (ANTI no familia vitima). Diskusaun la'o ho enerjia, inklui conselhor PR Ramos-Horta nian defende libertasaun Maternus Bere. Bele hetan notulen iha ne'e.

Iha loron hanesan, La'o Hamutuk fo sai ami nia Analiza kona ba kazu ida ne'e.

Iha 2 Outubru, Sekretariu-Jeral ONU nian fo relatorio ba Konseillu Seguransa kona ba UNMIT durante fulan sia. Parte relevante tuir mai, ho ligasaun husi paragrafu relevante, ho linha hatama husi La'o Hamutuk:

33. iha 8 Agostu, polisia halo detensaun ba eis komandante Laksaur Martenus Bere ba mandatu extraordinaria ida ba krime gravez kontra umanidade. Alegasaun kontra nia inkluindu ninia involvimentu iha masakre igreja Suai iha Distritu Covalima, ne'ebe halo ona iha 6 Setembru 1999, ne'ebe oho kuaze ema nain 200, inkluindu feto, labarik no amu-lulik nain tolu. Moris no hela fatin iha Indonezia, nia hetan kapturasaun husi polisia nasional durante halo vizita ida ba Timor-Leste no lori ba hatama iha prizaun Becora iha Dili hanesan ema ida iha detensaun pre-julgadu. Nia hetan libertasaun iha 30 Agostu ba Indonezia nia autoridade  iha sira-nia embasada iha Dili, iah reportazen fosai katak Indonezia nia ofisial hein hela konfirmasaun atu fo libertasaun ba ema ne'e molok nia hiit-an mai tuir selebrasaun aniversariu konsultasaun popular iha Timor-Leste. Libertasaun ne'e hamosu kestaun ba violasaun lei nasional Timor-oan ninian nomos padraun no prinsipiu internasional sira. estetmentu fosai husi ha'u-nia porta-voz iha 31 Agostu re-afirma pozisaun Nasaun Unidus katak iha ne'eba labele iha amnestia ka impunidade ba krime gravez hanesan krime funu, krime kontra umanidade no jenosida. Altu Komisariu Nasaun Unidas ba Direitus Umanus mos buka dadaun urjentemente klarifikasaun kona-ba reportazen libertasaun no fosai publikamente katak nia makaas tebes kontra liberasaun ba ema ida ne'ebe mak naturalmente iha tiha ona mandatu kapturasaun.

34. Desizaun jere debate makaas no nakfera ba partidu politiku sira hotu iha Parlamentu, iha ne'eba Membru Parlamentu sira, inkluindu husi opozisaun no AMP, ezije esplikasaun ba libertasaun ne'e. Desizaun ne'e rasik deskreve diferentemente husi autoridade Timor-oan sira, Membru Parlamentu no sosiedade sivil, no balun husi “desizaun politika” ba “interferensia politika” iha prosesu judisiaria. Iha ne'eba mos ezije ba Ministra Justisa no Prokurador-Jeral atu ba hatan iha Parlamentu. iha 9 Setembru, Prezidente Tribunal Rekursu fosai communiqué ida hateten katak libertasaun ne'e la hetan mandatu desizaun tribunal ida no Inspektur Judisiaria bele investiga problema ne'e. Iha 10 Setembru, Primeiru Ministru publikamente fosai iha televizaun nasional katak nia mak responsavel ba desizaun ne'e. Iha 14 Setembru, lider partidu Fretilin introduz mosaun “laiha konfedensia” iha Parlamentu, ne'ebe diside iha 22 Setembru atu tau iha orariu ba debate ida kona-ba mosaun iha loron 5 no 6 Outubru. Maneira iha ne'ebe kazu ne'e bele atura bele iha konsekwensia seriu ba prospektu asegura akuntabilidade ba krime gravez ne'ebe akontese iha 1999.

Iha 12 Outubru, Parlamentu Nasional debate mosaun censura (laiha konfidensia) ba loron tomak, rona Fretilin nia estetmentu dahuluk  no Primeiru Ministru nia resposta kata ninia interpretasaun husi interese nasional importante liu duke halo tuir lei ka konstituisaun. Debate direkta halao husi Membru Parlamentu Nasional nain 43 husi 65 molok haan kalan. Hafoin sira hasoru-malun fali, Primeiru Ministru responde, Membru Parlamentu barak mak hatutan tan diskusaun, no Fretilin taka diskusaun. Oras tuku 10 kalan, Parlamentu halo votasaun: 25 (Fretilin, Kota/PPT and PUN) afavor no 39 (CNRT, PD, ASDT/PSD, Undertim) kontra.  Loron tuir mai, Governu no Oposisaun fo sai komunikade imprensa ho sira nia perspektiva.

Iha loron 13 Outubru, UNMIT halo relatoriu The Justice System of Timor-Leste: An Independent Comprehensive Needs Assessment, no esplika kona ba problema ruma iha independensia judisiariu nian, separasaun poder, no enfrenta impunidade.

Iha loron 22 Outubru, JSMP (Judicial System Monitoring Program) hatama ona Petisaun no Keisa Konstitusional ba Tribunal Rekursu.

Konseillu Seguransa ONU sei hasoru malun (press release, transcript) hodi koalia kona-ba Timor-Leste iha 23 Outubru, atu konsidera relatoriu husi Sekretario-Jeral ONU nian no simu diskursu husi SRSG Atul Khare. Molok enkontru ida ne'e, Timor-Leste nia sidadaun sira hakerek buat ruma ba sira. Iha enkontru ida ne'e, delegasaun balun kolia kona ba justisa, estadu direitu, no importansia atu hapara impunidade.  Diskursu husi SRSG Atul Khare.

Iha loron 29 Outubru, depois besik fulan rua hanesan bainaka iha Embasada Indonesia iha Dili, Bere fila fali ba Atambua, no hetan liberasaun. Amnesty International protesta Indonézia, iha tempu hanesan polítiku timór-oan sira finzidu-la-hatene kona-bá saida no oinsa ida ne’e akontese, no sira rasik la hatene ka involve iha akontesementu.

Iha 4 Novembru, porta-voz Sekretáriu-Jerál UNO hetan pergunta iha ninia konferensia imprensa loronloron iha Nova Iorke kona-bá kazu Bere ninia transferensia. Nia hataan katak "iha ne’ebá laiha buat ida mak UNO bele halo. Ami hatene kona-bá transferensia ne’e hanesan de’it ho ema sira seluk halo. Ami la iha informasaun adisional ruma kona-bá ne’e. Ha’u tenke buka tan informasaun kona-bá ne’e molok ha’u atu fó opiniaun ruma, ka Sekretáriu-Jerál ninia opiniaun kona-bá ne’e."  Loron tuir, nia hatutan tan nia komentáriu:

Ha’u hetan pergunta horisehik kona-bá ami-nia hanoin ba preokupasaun ne’ebé hato’o katak Maternus Bere, ema ne’ebé akuza ona ba halo krime grave kontra umanidade iha 1999, iha momentu ne’ebá iha Timór-Leste, ba tiha ona Indonézia. Misaun UNO iha Timór-Leste (UNMIT) hateten katak la iha informasaun kona-bá sirkumtansia Bere ninia fila ba Indonézia.

Pozisaun Nasaun Unidas nian katak iha ne’ebá la bele iha impunidade, espesialmente ba krime grave, inkluindu krime kontra umanidade, krime funu no jenosida, ne’e koińesidu liu. Kona-bá Maternus Bere, ida ne’e ami-nia pozisaun katak Sr. Bere tenke lori ba justisa. Ami-halo pozisaun ne’e klaramente ona iha okaziaun lobuk balun

Ami haree relatóriu média indika ona katak Maternus Bere transfere tiha ona ba Indonézia iha semana kotuk. Ami ladauk hatene kona-bá transferensia ne’e nune’e mos ami seidauk simu konfirmasaun ofisiál katak transferensia ne’e akontese dunik tiha ona. Ba ami, hahalok ruma ne’ebé la tuir regra lei, partikularmente refere ba akontabilidade ba krime grave, ida ne’e lamentavél tebtebes.

Ha’u atu fó hanoin fali katak Sekretáriu-Jerál hato’o ona ninia esperansa iha ninia relatóriu iha fulan kotuk ba Konsellu Seguransa katak “Governu rua Timór-Leste no Indonézia sei asegura katak Maternus Bere sei lori dunik ba justisa, ho konsiderasaun ba relatóriu husi Komisaun Péritu ne’ebé mak dezigna ona iha 2005”.

 

The Timor-Leste Institute for Development Monitoring and Analysis (La’o Hamutuk)
Institutu Timor-Leste ba Analiza no Monitor ba Dezenvolvimentu
Rua D. Alberto Ricardo, Bebora, Dili, Timor-Leste
P.O. Box 340, Dili, Timor-Leste
Tel: +670-3321040 or +670-77234330
email: 
laohamutuk@gmail.com    Web: http://www.laohamutuk.org    Blog: laohamutuk.blogspot.com