Kompara ho tinan pasadu (hosi PNUD Timor-Leste nia notas esplikasaun, ho tradusaun no aumenta ho kór mahar metan hosi La'o Hamutuk)

Timor-Leste nia valor IDU ba 2012 iha 0,576 – iha kategoria dezenvolvimentu umanu médiu – pozisiona Timor-Leste iha ranking 134 hosi nasaun no territóriu 187. Entre 2000-2012, valor IDU Timor-Leste sa’e hosi 0,418 ba 0,576, katak sa’e persentajen 38 ka média kreximentu anuál maizumenus 2,7%. Ranking IDU Timor-Leste nian ba 2011 iha 134 hosi nasaun 187 bazeia ba dadus no métodu sira ne’ebé uza tiha ona iha 2012. Iha Relatóriu Dezenvolvimentu Umanu 2011, Timor-Leste nia ranking iha 147 hosi nasaun 187. Maske nune’e, ne’e hadalan sala bainhira atu kompara valór no ranking foun liu ho sira seluk ne’ebé antes ne’e publika ona, tanba dadus no métodu prinsipál sira hetan ona mudansa.

GNI nudár sasukat ne’ebé di’ak liu atu sukat rendimentu povu Timor-Leste?

Reseita tomak mina-rai no gas Timor-Leste nian ba Estadu, ne’ebé apropriadamente osan sira ne’ebé rai iha ita nia Fundu Petrolíferu ba uzu futuru nian. La’o Hamutuk hanoin katak reseita mina-rai la’ós komponente apropriadu ida atu sukat Dezenvolvimentu Umanu. Timor-Leste nia Fundu Petrolíferu no ita nia dependénsia boot ba esploitasaun mina-rai iha tasi laran halo estatístika ida ne’ebé la besik ba malu no presiza kuidadu bainhira ita halo analiza ba ita nia dadus rasik. Timor-Leste nia GNI maizumenus dala haat boot liu fali duke ita nia GDP (la’ós-mina-rai) (laiha nasaun seluk ho diferensa duplu), no ajénsia balu uza GNI atu kalkula indikadór, no ajénsia seluk uza GDP.

Imajen iha liman loos, hosi aprezentasaun La’o Hamutuk fó ba Koligasaun Timor-Leste ba Edukasaun (Rede Edukasaun), hatudu oinsá UN ESCAP gaba tiha despeza públiku Timor-Leste nian ba edukasaun (kinur) iha sira nia Statistical Yearbook iha Outubru 2012. La'o Hamutuk aumenta númeru ho kór mean atu hatudu rezultadu karik kalkulasaun sira bazeia ba GNI duke GDP. Maske distorsaun ida ne’e la afeta ba Indise Dezenvolvimentu Umanu PNUD nian, ida ne’e ilustra problema ida ne’ebé redús indikadór barak ne’ebé util iha baze de dadus estatístika PNUD no sira seluk nian.

Baze ida ne’ebé di’ak liu duke GNI ka GDP bele sai “GDP ida ne’ebé efetivu” – Kalkula nudár GDP la’ós-mina-rai aumenta ba montante osan ne’ebé foti hosi Fundu Petrolíferu durante tinan espesífiku ruma. La’o Hamutuk fiar katak ida ne’e sei permite komparasaun ne’ebé akurat liu kompara ho nasaun seluk, maibé ekonomista akadémiku sira la konfortavel ho ida ne’e, no ajénsia internasionál prefere inkonsistensia ba metodolojia ne’ebé espesífiku ba nasaun ida. Indikadór saida de’it mak uza, ne’e tenke ajusta ba populasaun, ekivalensia podér sosa nian (ne’ebé diferente duni maske entre nasaun sira ne’ebé uza moeda ne’ebé hanesan) no inflasaun durante tempu tomak nian.

Relatóriu Dezenvolvimentu Umanu 2010 introduz Indise Pobreza Multidimensional (IPM), ne’ebé identifika iha deprivasaun múltipla iha uma kain ne’ebé hanesan ba iha edukasaun, saúde no standar moris nian. Dimensaun edukasaun no saúde nian bazeia ba indikadór rua ba kada dimensaun, iha parte seluk dimensaun ba standar moris nian bazeia ba indikadór neen. Indikadór tomak presiza atu harii IPM ba uma kain ida foti hosi survey uma kain ne’ebé hanesan. Indikadór sira ne’e sukat duni ona, no skor deprivasaun nian kalkula ba kada uma kain iha survey. Pontu de korte ida hosi porsentu 33,3, ne’ebé ekivalente ho 1/3 ho indikadór sira ne’ebé sukat ona, uza atu haketak entre kiak no la’ós kiak. Karik deprivasaun uma kain nia skor iha porsentu 33,3 ka boot liu fali, katak uma kain ne’e (no ema hotu ne’ebé iha laran) multidimensionalmente kiak. Uma kain ho skor deprivasaun nian boot liu fali ka ekivalente ho porsentu 20 maibé menus hosi porsentu 33,3 nudár vulneravel ba ka iha risku atu sai multidimensionalmente kiak.

Survey dadus barak liu foin daudauk ne’e bele hetan no bele uza atu halo estimasaun IPM ba Timor-Leste ne’ebé koleta iha 2009/2010. Iha Timor-Leste, populasaun porsentu 68,1 moris iha pobreza multidimensional (MPI bazeia ba kada ema) no iha parte seluk porsentu 18,2 vulneravel liu hodi halo deprivasaun múltipla. Intensidade deprivasaun katak, média persentajen deprivasaun nian esperiente hosi povu ne’ebé moris iha situasaun pobreza multidimensional – iha Timor-Leste númeru ne’e uluk iha porsentu 52,9. Valor IPM nasaun nian, nudár parte populasaun ne’ebé multidimensionalmente kiak ne’ebé ajusta hosi intensidade deprivasaun nian, iha hela 0,36.

Deziguáldade ne’ebé Ajusta ona ba Indise Dezenvolvimentu Umanu (IHDI) (hosi PNUD)

IHDI la konsidera de’it média realizasaun ne’ebé nasaun ida atinje iha saúde, edukasaun no rendimentu, maibé mós oinsá realizasaun hirak nasaun ida nian ne’e distribui entre nia sidadaun sira liu hosi “deskontu” valor médiu kada dimensaun tuir ba nasaun ida nia nivel deziguáldade. Intrepretasaun katak, nune’e, enkuantu IDU bele hare nudár índise ida hosi dezenvolvimentu “potensiál” umanu ne’ebé loloos bele hetan bainhira realizasaun hirak ne’e distribui ho iguál, IHDI ne’e nudár nivel “real” dezenvolvimentu umanu (inklui deziguáldade distribuisaun rezultadu sira entre ema sira iha sosiedade ida). Tanba ne’e, IHDI sei sai iguál ba HDI bainhira laiha ona deziguáldade iha distribuisaun rezultadu ne’ebé atinje ona ba entre ema iha sosiedade, maibé bainhira IHDI menus hosi IDU ne’e signifika katak deziguáldade sa’e. Dezenvolvimentu potensiál umanu lakon bainhira iha deziguáldade, katak iha diferensa entre IDU no IHDI, diferensa ne’e hatudu ho persentajen ida.