La’o Hamutuk

Bulletin  |  Surat Popular  |  Topic index  |  Reports & Announcements  |  Updates
Reference  |   Presentations  |  Mission Statement  |  LH Blog  |  Search  |  Home

Ironi: Timor Kiak Maibe Suporta Australia

Oleh: Demetrio do Amaral de Carvalho[1]

Suara Timor Lorosa'e, 3 Februari 2004

Oras ne’e dadaun Timor Leste tama ona iha tinan desenvolvimento hanesan pais ukun an ida ba ba dalarua. Plano desenvolvimento Timor Leste nian, atu alkansa objetivo bot kona ba redusaun pobresa husi strategia bot ida, atu dudu liu husi inkresimento ekonomia. Atu iha inkresimento positivo ida, klaru katak Timor Leste tenki iha posibilidade husi rekursu oin-oin hanesan nia modalidade atu desemvolve an. Ho kondisoens ida ne’e mak halo Governo nomos povu  Timor Leste tau ekpektativa as duni ba Timor Leste nia rekursu mina rai no gas iha Tasi Timor.

Basea ba riku soin nebe mak preserva iha Tasi Timor, Governo halo ona desisaun importante ida  ke diak atu labele impresta osan iha Banku Mundial. Ida ne’e hanesan hanoin ba futuru, atu labele hatodan gerasaun ikus ho tusan. Ida ne’e mos hanesan prinsipio fundamental iha konseito desenvolvimento sustentavel. Governo merece duni hetan aplaus husi desizaun ida ne.

Maibe molok to’o iha kondisaun ideal ne’e, povu Timor Leste tomak, governo, partido nebe deit, komponente sosiadade civil sira hotu atu hamutuk iha strategia nasional ida atu hasoru nasaun bot nebe mak hanesan vijinho importante ba Timor Leste, dala barak ona hatudu ninia atitude politika ba povu Timor Leste nomos komunidade internasional hodi foti Timor Leste nian riku soin iha nia tasi laran, hanesan oras ne’e halao dadauk iha Coralina no Laminaria.

Refleksaun ba Storia no Filosofia “Han Isin Sikat Ruin”

Iha tinan 1945 Australia halo combate hasoru Japaun iha Timor nia teritorio. Iha tempo neba, ema funu nain Timor nian barak mak fo an ba mate atu salva nomos kolabora ho soldado Australia sira. Proseco funu tinan tolu nia laran ne’e, lokalizado deit iha Timor Leste nia teritorio laran ho nune la’hakur ba teritorio Australia nian. Ida ne’e hatudo katak, Timor fo duni ema nia vida no rain atu satan netik expansaun funu husi soldadu Dai Nipon iha “segundo gerra mundial” atu to’o ba Australia.

Proseco storia Timor Leste nia tulun iha funu 1945 ba Australia liu ona. Iha tinan 1975 Governo Australia hatudo duni nia an hanesan rai bot nebe hatene oinsa hakfilak filosofia Timor nia katak ‘han isin sikat ruin’. Maibe, Australia hatudu ba Timor Leste oinsa ‘han isin sikat ruin hodi fo ruin’. Rai bot nebe mak sai hanesan maluk ‘uma sorin’ (tetangga) hatudu duni saida mak naran civilizasaun no respeito dereitos humanos. Governo Australia hatudu duni nia suporta ba invasaun okupantes militar Indonesia iha Timor Leste. Liu husi declarasaun oficial husi nia Primeiro Ministro tempo neba naran Gough Whitlan hatudo ba povu Timor sira no komunidade internasional katak Governo Australia iha reconhesemento ba Indonesia (Le: Politika Batik, George Adjitcondro).  Maski, husi hahu kedas nia jornalista sira balun mate tamba violasaun husi militar Indonesia. Iha tinan 24 nia laran, dala barak hakanek ema povu ki’ik iha Timor Leste nia fuan, husi sira nia amizade ho governo no militar Indonesia hodi halao operasaun militar iha Timor Leste nia laran tomak.

Opersaun ida nebe mak to’o oras ne’e, sei iha nafatin nia impakto. Husi impakto psikologico, politika, ekonomi, kultural to’o mos impakto ambiental.

Impakto psikologico, ba ema Timor Leste tomak, maski nia pro-Independensia ou pro-Indonesia, tamba husi funu ida nebe violente tebes durante tinan 24 ne’e, halakon ema barak nia vida husi parte rua ne’e, la kimporta, hanesan ema pro-Jakarta.

Balun mate duni tamba Indonesia nia kilat musan ida nebe mak mai husi suporta Governo Cambera iha tempo neba.

Impacto politika, bele hare husi posisaun governo Australia nebe mak defende Indonesia nia invasaun influensa maka’as conjuntura politika internasional, nebe mak halo nasaun barak la hatudu ofisialmente sira nia simpatia no empatia ba rai Timor Leste nebe mak nia povu terus tebes.

Impakto kultural, bele hare husi influensa iha lia fuan, atitude moris loro-loron nian nomos ‘stilo de consumo” ida nebe mak hanesan efeito husi komunikasaun sosial durante tinan 24 ne’e, husi regime okupantes nia instrumentos birokratikus sira.

Impacto meioambiental, ne buat ida komplikado tebes, nomos dalaruma asosiativo tiha ho aspeito seluk. George Adjitcondro refere ba kilat nebe mak militar Indonesia sira uja mai husi Inglatera, Stados Unidos nomos rai bot seluk, nebe mak suporta no fa’an kilat, aviaun, bomba ‘napalm’ ba militar Indonesia. Sasan ba funu nebe mak sira uja iha funu laran ne’e hanesan kontribusaun kolektivo rain bot sira ne’e. Karik efeito ‘quimicas’ husi aramamentos funu nian presija atu analiza nia efeito quimicas ba rain nomos buat horis seluk, atu hodi hatene iha duni efeito ka lae? Maibe, iha faktos hatudu katak, programa setlement foun ba povu lokal nomos ba transmigrantes rai seluk iha Timor Leste halo mundansa bot ba kualidade meiambiente no ekosistem. Rain buras barak nebe mak iha ai horis spesifiko nomos bele kategoria hanesan ‘spesies endemik’, Governo Indonesia sira transfere tiha ai laran ne’e  hanesan lokalidade foun ba transmigrantes sira. Ne’e mak exemplo ki’ik oan balun husi impakto meioambiental durante funu ida ne’e.

Impakto ekonomiko, ida ne’e mos komplikado tebes. Exemplo ida deit kona mina rai no gas husi ‘Timor Gap’. Governo Australia taka tilun deit hodi hare ba mina rai no gas iha Timor Gap, hatudu duni nia atitude la respeito povu Timor Leste katak iha mos nia dereito atu ukun an, iha dereito mos ba riku soin iha rai no tasi. Akordo nebe mak asina iha aviaun leten  iha tinan 1989, oras ne’e dadaun sai hanesan ‘frame’ ba akordo governo Australia no Governo RDTL kona ba JPDA (Joint Petrolium Development Area)

Uluk Hakanek Fuan, Oras Ne’e Halo Dolar Ema Timor Leste

Loron 26 January liu ba ema barak tenik hanesan “Australia Day” loron bot ba Australia. Oras ne’e sai hanesan termo ida ho tensaun rua. Ba maluk Aborigin sira dehan hanesan loron invasaun, maibe ba maluk seluk nebe mak to’o ikus, dehan loron ‘ukun an’. Iha loron hira liu ba, organisaun lubuk ida hanesan Perkumpulan HAK, Haburas, Fokupers, Lao Hamutuk, Laifet, KSI, KSTL, Cegeptil, GMPD nomos Servico ba Advocacia Forum NGO hamutuk iha groupo CIITT (Centro Informasaun Independente ba Tasi Timor) haruka surat deklarasaun ba perss no hatudu laran la haksolok ho dominasaun Governo Australia nebe halao akordo ho Governo RDTL.

Organisaun solidaridade barak iha mundu tomak haruka protesta ba governo Australia iha loron neba. Husi Inglatera organisaun hanesan CAFOD, TAPOL, Indonesian Human Rights Campaign, CIIR haruka protesto makas mos. Husi Stados Unidos ETAN ho groupo solidaridade balun haruka declarasaun ba Governo Australia iha loron ne’e. Husi protesto hirak ne’e hatudo katak iha deskontente nomos urge husi groupo barak ba Governo atu respeito povu Timor nia dereito.

Povu Timor Leste hanesan rai kiak ida iha Asian nebe mak nia kondisaun atu hanesan ho rai Rwanda iha Afrika. Husi tempo transisaun to loron ohin sei moris husi tulun komunidade internasional nian. Povu barak liu sei moris ‘dolar’ teb-tebes, tan deit fa’an fehuk no tomati mos laiha folin dadaun ona, tamba produtus hirak ne’e mos mai husi Australia no Singapura, nebe mak ema bele sosa iha supermercado ou mercado. Ida ne hanesan mos efeito husi mercado livre ida besik ‘liar’ ne’e.

Timor Leste sei laiha osan rasik atu halao desenvolvimento. Ironi tebes, tamba ho kondisoens hanesan ne maibe beneficio husi mina rai iha Coralina no Laminaria nebe mak besik los ba rai Timor husi linha liur parte weste kona ba JPDA nian. Se karik akordo atu desenvolve JPDA ne’e uluk basea ba linha lateral ou ema haktenik hanesan median line mak riku soin nebe iha Coralina ka Laminari tenki 100% ba Timor Leste.

Ho nune, maski Timor Leste hakilar hela atu husu tulun ba komunidade internasional, maibe iha parte seluk riku soin tuir lolos husi rain Timor oferese tomak ba Australia.

Tuir mai bele hare tabela kona ba beneficio nebe mak Australia foti iha Coralina no Laminaria husi tinan 1999-2003.

Tinan

Osan (Revenues) ba Governo Australia ($ US)

1999

Tokon 26 ou 26 million

2000

Tokon 640

2001

Tokon 533

2002

Tokon 371

2003 (Jan-Juni 03)

Tokon 122

Total

Tokon 1692

Governo RDTL determina valor budget ba tinan ida ho quantidade hakbesik ba dolar tokon 200. Husi quantidade ida ne’e bele hateten katak, fonte husi rai laran kuase menus liu, nomos depende liu ba taixa. Karik, Governo RDTL bele mobiliza rekurso ho valor hanesan tabela ne, mak Governo RDTL bele financia mesak aktividade administrasaun nomos desenvolvimento ba tinan nen ka walo nian.

Husi kondisaun limitado hanesan ne’e, mak importante tebes atu mobilize Timor Leste nia rekurso husi mina rai nebe hasai husi Tasi Timor. Ho hanoin hanesan ne’e, importante ba governo RDTL atu koalia ho governo Australia nebe mak tinan lima ona hasai mina husi Coralina-Laminaria atu bele respeito Timor Leste nia dereito. Tamba, ironi ba nasaun ki’ik nebe mak klasifika hanesan nasaun 20 nebe mak kiak liu iha mundu, suporta ba governo Australia ho orsamento ida ke bot tebes husi Timor Leste nia soin.

horizontal rule

[1] Demetrio do Amaral de Carvalho, service dadaun ho Fundasaun Haburas nomos hanesan membros RENETIL.

The Timor-Leste Institute for Development Monitoring and Analysis (La’o Hamutuk)
Institutu Timor-Leste ba Analiza no Monitor ba Dezenvolvimentu
Rua D. Alberto Ricardo, Bebora, Dili, Timor-Leste
P.O. Box 340, Dili, Timor-Leste
Tel: +670-3321040 or +670-77234330
email: 
info@laohamutuk.org    Web: http://www.laohamutuk.org    Blog: laohamutuk.blogspot.com