La’o Hamutuk

Bulletin  |  Surat Popular  |  Topic index  |  Reports & Announcements  |  Updates
Reference  |   Presentations  |  Mission Statement  |  LH Blog  |  Search  |  Home

No Confidence Debate in Parliament
Debate Censura iha Parlamentu Nasional

Debate iha Plenaria Parlamentu Nasional

12 Outubru 2009

Informasaun tan:

Tuir mai:

Intervensaun Abertura Debate Mosaun Sensura Iha Parlamentu Nasional

Husi Aniceto Guterres, chefe Bankada Fretilin, Parlamentu Nasional

Sr. Presidente Parlamento Nacional, Exelencias, Sr. Primeiro Ministro no nia Membros do Governo, Distintos Colegas Deputados, Povo Timor-Leste tomak,

Ohin, loron ida ne’ebe inportante tebes, liu-liu ba Parlamentu Nasional ne’ebe pela primeira ves halo debate ba Mocao de Censura hasoru Governo. Debate ida ne’e sai hanesan exersiu ida, ba ita hotu nia komitmentu atu hari’i no hametin, cultura democratica no institusional iha ita nia Estado, nudar Estado de Direito Democratico ida, iha estadu ida ne’ebe, respeitu ba konstituisaun no ba lei hotu-hotu, no respeitu ba instituisoens ne’ebe demokratikamente eleitus, maka sai nudar baze inkestionavel.

Mocao de Censura ka Mosi Tidak Percaya ida ne’e, ne’ebe mai hosi 17 deputadus, hetan nia base iha artigu 111 Konstituisaun da Republika nudar lei base ka lei inan, Konstituisaun ne’ebe hamosu Estado de Direito Democratico ida ho naran Republika Demokratika de Timor-Leste, ka RDTL.

Konstituisaun ida ne’e duni, maka fo dalan no k’bit ba ita idaidak, nune’e maka ita iha Presidente da Republica ida nudar orgaun unipesoal, Parlamento Nasional ida nudar orgaun kolektivu hosi deputadus hotu-hotu, iha Governo ida ho nia Primeiro Ministro, no iha mos tribunais no juiz sira. Se laos tanba k’bit hosi konstituisaun ida ne’e, ita, kala iha maka Yang Mulia Bapak Gubernur Xanana Gusmao, Yth bapak Ketua DPRD Fernando Araujo, no deputadu sira iha ne’e, ne’e kala sai deit bapak-bapak anggota DPRD yth, no hotu-hotu hamutuk hein ordem ka petunjuk tun mai hosi Jakarta.

Hodi konstituisaun ida ne’e mos, partidus politikus sira ne’ebe lakon iha eleisaun 2007, halo koligasaun ida hodi hamosu Aliansa Maioria Parlamentar ka AMP, nomos mosu governo ida, ne’ebe ita balu dehan Governo de Facto, no balu fali temi an IV Governo Constitusional.

Sr. Presidente, Senhores deputados,

Nudar signatarius ba Mocao Censura ne’e, ami louva atetude Governo nian ne’ebe hatudu sira nia vontade no koragem, mai iha uma fukun ida ne’e, hodi atende debate ba mosaun sensura maske hasoru duni Governo.

Uluk kedas wainhira ami hatama mosaun ne’e, maske iha tentativa oioin, ami sempre fiar katak to’o iha momentu propriu Governo sei mai, no ohin mai duni iha ne’e, hodi kumpri nia dever no obrigasaun konstitusional, atu responde perante Parlamento Nasional tuir artigu 107 Konstituisaun nian haruka. Ami fiar tanba, Governo ida ne’e lidera hosi Primeiru Ministru ida naran Xanana Gusmao, ne’ebe ita hotu-hotu respeita nia nudar maun bot, funu nain ka combatente ida, membru CCF no ikus sai Comandante das FALINTIL no Lider maximu resitensia nian iha funu ba libertasaun nasional, no sai mos nudar primeiro Presidente da Republica hafoin independensia.

Ho maun bot sira seluk, mak balu mate ona no balu ne’ebe sei moris, maun bot Xanana hahu funu hodi hatudu dalan mai ami, fo inspirasaun no hanorin ami, no ita hotu, atu luta ho determinasaun ba libertasaun Nasonal, no defende independensia nasional; hanorin mos ami atu combate forma oioin tirania, opresaun no dominasaun; nia hanorin atu ita hotu tenke hahi demokrasia, respeita direitos humanos, no garante justisa ba ema hotu.

La iha duvida, ema hotu rekonyese katak Maun bot Xanana nudar lider bot ida ne’ebe sai inspirador, sai mata dalan, sai mestre ba ita hotu iha prosesu luta ba independensia nasional, no prosesu konstrusaun no hametin ita nia estadu de direito ida ne’e.

Sr. Presidente, Ilustres Deputadus,

Ema hotu hakfodak, maske balu pro balu kontra, wainhira Governo halo desizaun retira Maternus Bere, lider milisia Laksaur ida, ne’ebe indisiadu halo krime kontra humanidade nudar Co-autor ba masakre iha Igreja Suai, tinan 1999. Milisia ne’e halao hela ninia prizaun preventiva iha prizaun Becora, tuir ordem juis tribunal Suai nian, wainhira Governu retira nia hosi prizaun sem aktu judicial ruma, iha 30 de Agosto 2009, loron ne’ebe povo tomak komemora loron referendum, loron konfirmasaun vontade povo nian ba independensia.

Desizaun Governo nian retira ka hasai Maternus Bere sem aktu judicial, halo ema barak preokupa, maske balu ne’ebe hipokrita “biasa-biasa” deit. Ema preoukupa tanba desizaun ne’e halakon ema nia direitu liu-liu vitima sira atu hetan justica, la tuir dalan no hakat kompetensia ne’ebe konstituisaun ho lei admiti.

Preoukpasaun ne’e mai hosi entidades no personalidades oioin. Ita bele regista, hanesan reasaun Sr. Deputadu Aderito Hugo ne’ebe dehan “ema ne’ebe hasai Maternus Bere, ema ne’e laiha moral, ema ne’e nia oin mahar duni hanesan karau kulit. Hanesan mos, saida maka Sr. Xavier do Amaral, proklamador e primeiru Presidente da Republika hatete, ema ne’ebe hasai Maternus Bere laiha klamar, nega povu nia terus, no laiha respeitu ba justisa.

Hirarkia Igreja Catolica, mos lamenta tebes no hato’o kritikas fortes hasoru desizaun ida ne’e. Presidente do Tribunal de Recurso, iha nia komunikadu hato’o ba publiku katak laos tribunal maka hasai, nune’e aktu ne’e kontra lei penal, artigu 245 Kodigu penal Timor-Leste nian. Nia dehan tan, “Wainhira ita la tuir mekanismu legal atu resolve problema, problema bele sai bot liu tan hanesan ezemplu krise iha 2006”.

Conselho Seguransa ONU nian iha nia relatoriu fulan Outubro 2009, informa katak gabineti SG ONU nian mos kondena maka’as, tanba libertasaun Maternus Bere nudar viola ba resolusaun Konselu Seguransa n. 1704, no kontra pozisaun ONU konaba justisa ba krimes graves. Altu Komisaridu Direitos Humanos ONU nian, mos kondena maka’as desizaun Governo nian halo libertasaun ne’e. Presidente EUA, Barack Obama iha nia diskursu iha Asembleia Geral ONU nian temi mos Timor-Leste hamutuk ho rai sira seluk Haiti no Somalia, nudar estadu ne’ebe fragil, tanba ne’e nia husu atensaun no apoiu hosi membros ONU atu hametin paz no hametin konfiansa povo nian ba justisa iha rai sira ne’e.

Governu rasik liu hosi nia membrus governu balu, nune’e mos deputadus AMP nian, iha sira nia deklarasaun ba orgaun komunikasaun social no iha sesoens plenarias Parlamentu ne’e duni, rekonhese ona halo duni libertasaun illegal ba Maternus Bere, nudar desizaun politika, ne’ebe ema hotu tenke simu no halao. Sr. primeiru Ministru rasik, iha nia deklarasaun ba orgaun komunikasaun social rekonhece fo ordem atu hasai Maternus Bere hosi prizaun Becora, sem aktu judicial, no nia rasik aseita hola responsabilidade ba desizaun ida ne’e.

Sr. Presidente Parlamento Nacional, Exelencias, Povo Timor-Leste tomak,

Politika maka hamosu lei hotu-hotu, atu lei inan ka lei oan, maibe wainhira lei iha ona politika tenke submete ba lei. Nune’e, maka desizaun ne’ebe mai hosi exersisiu politika ida, desizaun ne’e por sua natureza tenke tuir lei. Tanba, wain hira desizaun politika ida kontra fali lei, maka ema idaidak sei halo tuir nia gostu ka tuir nia interese. Ne’e, loke ona dalan ba ditadura, ema ne’ebe ukun la ukun ho lei maibe manda ho forsa.

Kaju Maternus Bere, kaju ida ne’ebe ligadu ho kestaun Nasional konaba rekonsiliasaun no justisa ba krimes hotu-hotu ne’ebe akontese durante konflitu naruk hosi 1974 to’o 1999.

Ita hotu, timor oan hotu, hakarak rekonsilisaun no kuda paz iha ita nia rain, maibe rekonsiliasaun tenke lao hamutuk ho justisa, tuir politika rekonsiliasaun nasional ne’ebe konsagra ona iha artigu 160 no 162 Konstituisaun da Republica. Rekonsiliasaun tenke mai hosi konfisaun hosi autores, rekonhesimentu ba vitimas, no justisa. Justisa maka sai nudar ponte ba rekonsiliasaun no paz. Se laiha justisa, bele iha rekonsiliasaun maibe sei laiha paz.

Se Governo, ka se deit, wainhira hakarak muda politika rekonsiliasaun ida hanesan ne’e, sira tenke halo tuir nia dalan, tuir mekanismu ne’ebe iha, tuir lei, tuir idak-idak nia kompetensia. Laos halo konforme idak-idak nia gostu, tanba Timor-Leste nudar Republika Democratica—laos monarkia, iha nia konstituisaun nudar lei inan, iha nia lei propria, iha nia sitema rasik, iha orgaun soberania 4 maka representa estadu tomak.

Governo no bloku AMP tomak hakarak muda duni politika ida ne’e, hanesan sira hatudu ona iha deklarasoens no diskursu oioin. Nune’e, sira hakarak halakon justisa hodi troka ho rekonsiliasaun no sosa amizade ho Indoensia. Maibe, Governu ho nia bloku AMP tomak la hatudu sira nia konsitensia no determinasaun, la hatudu sira nia vontade politika, koragem no seriedade, atu hetan dalan oinsa muda politika ne’e.

Relatoriu CAVR ho nia rekomensoens, kleur ona para hela iha Parlamentu ne’e, maibe tanba hakarak ignora rekomendasoens konaba justisa, dokumentu ne’e nunka hetan prioridade atu diskute, maske Bankada FRETILIN egige ona dala barak. Hanesan mos Relatorio CVA, maske laiha rekomendasoens ruma atu kompromete justisa, no la fo amnestia ba ema ruma tanba la prinese kriteriu ba ida ne’e, tama ona iha Parlamentu iha Outubro 2008, maibe la hetan atensaun ka ignora tiha.

Iha primeira Legislatura, Parlamentu Nasional aprova tiha ona Lei Amnestia ida, maibe tanba ema balu hanoin katak lei ne’e atu fo fali benefisiu ba maioria FRETILIN iha Parlamentu Nasional ninian ema sira, lei ne la hetan promulgasaun hosi SE Sr. Xanana Gusmao, nudar PR iha tempu neba.

SE. Presidente da Republica, Laureadu Nobel da Paz, Dr. Jose Ramos Horta, mos dala barak ona hola inisiativa hodi diskute kestaun justisa no rekonsiliasaun ho lideres partidus politikus, no nia husu mos atu liu hosi Parlamentu Nasional halo lei konaba amnestia ba krime hotu ne’ebe akontese iha 1974 to’o 1999, maibe bloku AMP nunka hakarak uza sira nia maioria atu hato’o proposta ka halo lei amnestia.

Sr. Presidente, Exelensias,

Iha Estadu de direito Timor-Leste, la iha dalan seluk atu hasai Maternus Bere ne’ebe halao dadauk prosesu justisa, se laos tuir dalan ne’ebe konstituisaun no lei admiti. Se lakohi halo justisa ka atu hasai ema ida hosi kadea, nia dalan maka, liu hosi desizaun tribunal, halo amnestia, no fo indulto.

Tuir Kodigu Penal Timor-leste nian artigu 245 n. 1 katak “ se maka, ho meiu illegal, hasai hosi kadeia ema ne’ebe, tuir lei, lakon tiha ona nia liberdade, ka fo tulun ba ema ne’e atu halai, sei hetan pena prizaun tinan 2 to’o tinan 6.

Iha Konstituisaun da Republica, tuir sistema separasaun de poderes, defini ona no fahe poder ba orgaun soberanu hat, ne’ebe orgaun idaidak bele exerse nia poder no la fo fatin ba orgaun ida atu halao fali orgaun seluk nia poder.

Presidente da Republica, maka iha kompetensia ka poder atu fo indultu ka komutasaun de pena ba ema ruma, hafoin prosesu justisa iha tribunal. Ne’e, maka ita hare hanesan desizaun kona indultu ba Rogeriu Lobatu, Jony Marques no sst, ne’ebe ema balu kestiona, maibe tuir lolos la hanesan ho kaju Maternus Bere nian, tanba PR maka hasai duni indultu, tuir nia kompetensia ne’ebe konstituisaun fo.

Parlamentu Nasional maka bele fo amnestia ba ema ruma, maibe nudar orgaun koletivu, Parlamentu fo amnestia ne’e liu hosi aprovasaun ba resolusaun ka lei amnestia hosi deputadus hotu. Laos Presidente Parlamentu mesak maka hola desizaun.

Tribunais maka Administra justisa, maibe nia rasik independenti. Katak orgaun soberanu seluk ka se deit labele halo interferensia, maibe halo tuir deit sa ida maka konstituisaun no Lei haruka. Tribunal maka bele haruka hatama ema ida iha kadeia, juis maka bele haruka hasai ema ne’ebe juiz ida haruka ona hatama iha kadeia.

Nune’e, maka orgaun soberanu ne’ebe laos tribunal la iha poder atu hasai ema ne’ebe tribunal haruka hatama tiha ona iha kadeia, maske ho baze iha razoens politikas.

Sr. Presidente, Exelencias,

Konstituisaun no lei ne’ebe vigora iha Timor-Leste la fo dalan, nem itoan, ba Governu atu hasai Maternus Bere hosi Prizaun Becora, sem aktu judicial hosi autoridades tribunal nian. Ne’e duni, saida maka Governo halo hanesan buat ne’ebe sira rasik rekonhese tiha ona, sai nudar aktu illegal no krime, nudar hahalok interferensia no hakat liu ka hadau poder hosi orgaun sobernu seluk nian.

Hahalok sira hanesan ne’e, hatudu momos ona katak Governo, liu-liu Sr. Primeiro Ministro rasik, kontra ona no hakanek Konstituisaun da republica, viola lei penal no prosesu penal ne’ebe vigora iha Republica Democratica de Timor-Leste.

Wainhira Governo ida hatudu nia hahalaok la respeita ona no hadau fali kompetensia orgaun soberania seluk nian, la iha ona respeitu ba konstituisaun, no viola lei ne’ebe iha, Governo ne’e laiha ona kondisoens atu dirigi nasaun nian destinu. Tanba ne’e, Governu ne’e merese duni lakon fiar hosi povu Timor-Leste nia representante iha uma fukun Parlamentu Nasional.

Parlamentu Nasional, nudar orgaun representativu povo nian, no ema hotu, iha dever no obrigasaun konstitusional atu labele admite Governo ida, ka se deit, maka hakarak haneha lei no sama fali konstituisaun, harahun estadu de direitu, sobu sistema separasaun de poderes, halakon ema nia fiar ba justisa, no estraga estabilidade nasaun nian.

Obrigadu!


Intervensaun – Resposta

Husi Sua Excelência O Primeiru-Ministru Kay Rala Xanana Gusmão

Versaun  textu   Portuguese    English

Iha termu nº. 1 husi artigu 111º.  Konstituisaun RDTL, mosaun sensura ba Governu kona-ba: 1­ezekusaun ba nia programa ka 2- assuntu ho relevante interese nasional.

Nune’e, mosaun sensura ida ne’e, ne’ebe Fretilin rekere, halao kona-ba ‘asunto ho relevante interese nasional’! no ‘asuntu ho interese relevante nasional iha kestaun, ne’ebe merese mosaun sensura ida ne’e, mak Sr. Maternus Bere! Tanba asaun ‘hasai husi kadeia Becora’, asaun ne’ebe, tuir Fretilin, ne’e hanesan ‘afronta klaru ida ba Konstituisaun RDTL no lei ne’ebe mak vigora iha ita nia País’, koalia kona-ba Maternus Bere.

(Nunka ema ne’e imajina katak sei kategoriza nia nu’udar ‘asuntu ho relevante interese nasional’, num país que nem é dele!)

I, iha dokumentu Mosaun, sei bele lé: ‘se mak deside hal ilegalmente’ no mos katak: ‘Primeiru Ministru rasik, iha nia deklarasaun ba orgaun komunikasaun sosial ..., ne’ebe admiti fo orden ba hasai Maternus Bere husi kadeia  Becora la liu husi aktu judisial no simu atu responsabiliza ba ne’e’.

Iha dokumentu ne’e duni, Deputadu husi Fretilin mensiona suposta ida ‘proposta amnistia ba krime hotu-hotu ne’ebe hala’o iha T-L entre 1974 too ohin loron’. Maibe  depois afirma katak ‘só desizaun ida husi Tribunal kompetente iha razaun ba matéria bele konsidera desizaun Estadu nian’.

Tanba nota katak deputadu requerentes husi Fretilin sira konfuzu iha sira nia ideia, permiti ba hau, distintu titular husi orgaun soberania ida ne’e, fahe hau nia intervensaun/resposta iha parte 3 ba abordajen ida ne’ebe global liu husi problemátika  Estadu nian. i, nune’e, hau nia intervensaun, sei rekere tempu tan liu minutu 30 ne’ebe ita nia Rejimentu fó.

Hau hakarak fo hanoin ba hotu-hotu katak, iha Marsu 1993, hau hetan julgamentu iha Díli, husi Tribunal indonéziu. Painel Juíz, ne’ebe nia kompetensia atu julga hau, hau kestiona, fo orden ba hau atu para lé hau nia ‘pleidoi’, proibi hau kontinua fo argumrntu ba hau nia defeza.

Hau hein katak, haree ba importánsia katak ‘assuntu ho relevante interese nasional’ nune’e rekere, iha Magna Casa demokrasia Repúblika Demokrátika Timor-Leste, distintu deputadu, nu’udar verdadeiru reprezentante aspirasaun demokratika husi ita nia Povu, sei la impede atu koalia ba hau nia defeza, iha tempu ne’ebe presiza. Kuantu ba hau, la justu  ba hau nia defeza hetan limitasaun husi regra interna husi Parlamento ida ne’e. Se imi halo, ne’e katak imi halo tuir hanesan ho juíz indonézia nian ne’ebe kondena hau ho pena perpétua, sein halo uitoan atu rona hau nia argumentu defeza nian.

I PARTE
Interese Nasional – Polítika Estadu – Desizaun Estadu

Hau hatene katak bankada Fretilin nian gosta hau mai iha ne’e hodi hatan deit kona-ba ilegalidade husi hau nia aktu, hodi nune’e Parlamentu Nasional bele too konkluzaun katak Governu, ne’ebe hau xefia, ‘laiha kondisaun atu diriji destinu nasaun ne’e, tal hanesan hatoo husi dokumentu sensura ne’e.

Labele diskuti ba aktu nia ilegalidade, sein iha kompriensaun ida ne’ebe luan liu tan kona-ba problema interese nasional tanba, hanesan hau refere iha inísiu, iha perspetiva ba‘asuntu ne’ebe relevante ba interese nasional’  ne’ebe mosaun sensura bele iha kabimentu legal no lori mai iha Plenária ohin nian.

Tan ne’e duni, iha parte I husi hau nian intervensaun, hau sei ba aborda tema hirak tuir mai ne’e: Interese nasional, polítika Estadu no desizaun Estadu nian.

Importa realmente hanoin uluk kona-ba saida mak ne’e, saida mak signifika, INTERESE NASIONAL?

- Hau uluk hanesan membru Komité Sentral Fretilin:

- Mudansa ne’ebe halo, iha 1986, hodi harii CNRM, mai husi konseit, perspetiva husi interese ba Luta, interese nasional. Kuandu iha 1997, mudansa dezignasaun ‘CNRM’ ba ‘CNRT’, halao iha kontestu interese ba Luta, interese nasional.

- Kuando, iha 1999, hala’o enkontru entre timoroan hotu, koñese ho naran Dare I, iha Dare, no Dare II, iha Jakarta, buat hotu halo iha kontestu ba  interese nasional.

- Kuandu, iha Agostu 1999, FALINTIL, decidi la tama iha kombate ho milísia, ne’ebe oho hela ita nia populasaun, desizaun ne’e foti iha kontestu ba interese nasional.

- Kuandu, durante tinan 2000 no 2001, hala’o enkontru rekonsiliasaun entre timoroan, iha fronteira, ho partisipasaun efetiva no determinante, dalabarak, husi distintu deputadu rekerente, Sr. Mandati, la ho kondisaun  nein finanseira nein lojístika, buat ne’e hotu halao iha kontestu ba interese nasional.

- Kuandu, iha 2001, depoisde timorizasaun  administrasaun, Ministru Xefe, iha altura ne’e Dr. Mari Alkatiri, ba reprezenta Timor-Leste, hamutuk ho Sérgio Vieira de Melo, vizita Jakarta no kaer liman ho jeneral indonezia, ida ne’e kompriende iha kontestu ba interese nasional.

- Kuandu, iha 20 Maiu 2002, Prezidente Megawati Soekarnoputri hetan aklamasaun husi populasaun no timoroan hotu ne’ebe prezente iha Tasi Tolu, ita nia Povu hatudu ninia persepsaun ne’ebe klaru kona-ba konseitu ‘interese nasional’.

- Kuandu, iha 12 Juñu 2003, Primeiru Ministru, Dr. Mari Alkatiri, iha nia vizita ofisial ba Jakarta, defende, iha entrevista ida ba Agência Lusa, katak ‘ amnistia jeral ida ba responsável ne’ebe komete krime iha Timor-Leste iha 1999’, hanesan ‘ solusaun únika hodi korriji ‘ injustisa no inikuidade’ (liafuan husi Dr. Mari), ne’ebe, ho timoroan sira husi terseira liña iha kadeia no responsável sira seluk ‘difisilmente, dalaruma, hetan julgamentu’ (liafuan husi Dr. Mari).... iha rekoñesimentu klaru ne’ebe sei sai ‘impratikável’ lori ba tribunal  responsável prinsipal sira. Tuir Lusa, ‘ba Xefi Governu ne’e ‘pratikamente imposível’ iha entrega kbiit husi Konsellu Seguransa ONU ba kriasaun tribunal internasional kualker ida, nune’e mos katak sei komplikadu liu lori ba tribunal timor nian ida kualker militar, polísia ka ema indonézia sivil ida’.... Sei mos tuir Lusa, parte importante liu kona-ba deklarasaun husi Primeiru-Ministru iha tempu ne’ebe, Dr. Mari Alkatiri: ‘Laiha ema ida mak nega ka bele nega ba justisa. Ne’e hanesan kestaun sagaradu ida. Vizaun pragmátka hakarak husi prosesu dezenvolvimentu sosial no polítiku iha país ida-idak halai tuir sira nia ritmu normal, too ida-idak tau iha konsiénsia ba sira nia responsabilidade ba situasaun hirak ne’e (liafuan husi Dr. Mari). Buat hirak ne’e hotu hatudu kompriensaun ezata ba interese nasional, ne’ebe sei fo fatin ba polítika Estadu nian.

-Kuandu Parlamentu Nasional, iha nia I Legislatura, ne’ebe, husi asentu 88, Fretilin detein 65, kria Komisaun Akollimentu, Verdade no Rekonsiliasaun, ne’e iha espíritu defeza ba interese nasional. Relatóriu husi CAVR hau entrega ona ba PN, iha Novembru 2005. 

Iha dokumentu mosaun sensura, deputadu rekerente sira, realsa katak ‘iha total desrespeitu husi Governu ba orgaun soberania ida ne’e no ba tribunal’. Bem, too final husi  Leijislatura, maioria parlamentar, husi Fretilin, nunka hola inisiatva atu tau iha ajenda hodi diskuti kona-ba relatóriu no nia rekomendasaun, ne’ebe sei ajuda makaas ba Estadu hodi defini ninia polítika – hirak ne’e hatudu deit laiha interese total, husi parte Fretilin, ba asuntu  ho ‘relevante interese nasional’.

-Kuandu Parlamentu Nasional, iha I Lejislatura, ne’ebe,  husi asentu 88, Fretilin detein 65, kria Komisaun Verdade no Amizade, servisu hamutuk ho Indonézia, ne’e mos iha espíritu defeza ba interese nasional. Primeiru-Ministru husi I Governu Konstitusional asina akordu ida ho Estadu Indonézia. Atu simu Relatóriu, Dr. Mari Alkatiri prezente iha ne’eba mos, nudar espresaun mos katak, buat ne’ebe nia hahú ona, remata didiak ho misaun ne’ebe kumpri ona.

Maibe Parlamentu  ne’e mos nunka hola inisiativa atu tau iha ajenda  diskusaun kona-ba Relatóriu, ne’ebe Prezidente  Repúblika entrega ona, ne’ebe difikulta implementasaun rekomendasaun. Ho Xefe Bankada ne’e sai nudar Komisáriu iha CVA no Prezidente CAVR, Fretilin la book nia liman fuan ida no agora afirma katak ‘iha total desrespeitu husi Governu ba orgaun soberania ida ne’e no ba tribunal’. Ida ne’e hatudu falta konsiensia kona-ba interese nasional, hodi nune’e permiti atu Maternus Bere ida mosu agora hanesan ‘asuntu ho relevante interese nasional’.

-Kuandu Governu husi Dr. Mari Alkatiri koncorda ho asinatura  SOFAs nian, nomeadamente ho EUA, nudar PR hanoin iha entrevista ida foin dadaun, ne’e iha kontestu ba ‘interese nasional’.

Karísimos deputadus,

Interese nasional konsiste iha desenvolve Nasaun! Interese nasional konsiste iha defende progresu, estabilidade polítika, sosial no ekonómika no asegura segurança interna.

Interese nasional ne’e defende interese timoroan ida-idak nian. Interese nasional mos katak kria ambiente unidade no koezaun, katak promove rekonsiliasaun!

Maibe nita labele hela mesak iha mundu. Interese nasional presupoen, tanba ne’e, kumpri iha nº.4 husi artigu 8º. husi Konstituisaun RDTL, ne’ebe  Señor deputadu rekerente sira hanesan Francisco Branco, Joaquim Amaral, Elizário Ferreira, António Cardoso, Joaquim dos Santos e Manuel Tilman mos asina, iha 22 Marsu 2002.

Konstituisaun hatete: ‘Repúblika Demokrática Timor-Leste mantin lasu espesial amizade nian no koperasaun ho país vizinu no país iha rejiaun’. Ida ne’ebe, señor sira ne’ebe hakerek Konstituisaun Repúblika, mak tenki hatene sentidu ne’ebe apropriadu liu husi termu ‘lasu espesial’?

- Hau la hatene se Deputadu Arséniu Bano hatene  koana-ba  TNI ne’ebe tama iha baliza Oé-Cusse no, iha semana 2 liuba, akontese fali! Hau la hatene se akompaña hela difikuldade ne’ebe eziste iha prosesu delimitasaun fronteira, iha Oé-Cusse. Tanba nia mos rekerente, hau hanoin nia la hatene. Ka tanba nia la ba ona Oé-Cusse, ka, se ba, apenas atu konsolida partidu.

- Hau mos la hatene se Deputadu Aniceto Guterres hatene kona-ba delimitasaun  fronteira, iha área distritu Bobonaro. Parese ke lae, tanba delimitasaun fronteira, ba Deputadu Aniceto Guterres, la’os asunto ho interese nasional; Maternus Bere, sim, ne’e ho relevante interese nasional.

- Hau la hatene se deputadu sira husi Fretilin hatene katak ita iha estudante liu rihun 8 iha Indonézia. Hau bele kompriende se sira la hatene, hau bele kompriende katak deputadu sira husi Fretilin la ba Indonézia, katak deputadu sia husi Fretilin laiha familia iha Indonézia no, menus liu tan, deputadu sira husi Fretilin laiha oan mak estuda hela iha Indonézia. Maromak boot, se buat ne’e akontese duni, no sorte katak deputadu sira husi Fretilin iha vizaun ida ne’ebe estratéjiku liu, ne’ebe ultrapassa  Indonézia! Sira bele sai  husi Timor-Leste, ka ho Air North ka ho Silk Air.

- Hau la hatene se deputadu sira husi Fretilin hatene katak liu 75% husi movimentu komersial iha Timor-Leste ne’e ho Indonézia.

- Finalmente, hau hanoin katak deputadu sira husi Fretilin, tansa mak sira defini Maternus Bere hanesan ‘asuntu ho relevante interese nasional’, haluha tiha katak Indonézia mak hanesan promotora boot ba ita nia entrada iha ARF (Asean Regional Forum) no iha liña oin hodi defende inkluzaun Timor-Leste iha ASEAN.

Karísimu deputadu,

Oinsa koloka interese Estadu nian? Oinsa define polítika Estadu nian? No ba saida? No tanba saida? – pergunta ne’ebe difisil, ne’ebe hau labele hatán! Iha leten  liu husi hau nia kompetensia polítika. Fatin ne’ebe loos ba definisaun husi Estadu mak Parlamentu Nasional. Hau halo votu atu bele produz, tanba ita sei manán ho buat ne’e, aprende husi imi!

Hau husu lisensa hodi hatete katak politika ne’ebe ita nia Estadu sei hola mak, liluliu, atu salvaguarda interese nasional no interese nasional tenki ser, fundamentalmente, orientadu  hodi:

-garante soberania

-garante estabilidade no paz

-garante diplomasia insersaun ka integrasaun rejional

Se ita laiha objetivu klaru hodi defini  interese Nasaun, ne’ebe  politika Estadu nian harii ba, ita nia País la hatene atu bá ne’ebe.

Dr. Mari Alkatiri, iha Juñu 2003 liuba, dehan ona ba Lusa, durante ninia vizita ofisial ba Jakarta: ‘ Governu no Prezidénsia Repúblika, oinsa tenki lida loroloron ho kestaun ho relasionamentu bilateral entre país rua, hola abordajen pragmátika ida ne’ebe permiti avansa ho relasaun. Ita lakohi hakarak avansa ho abordajen ida ne’ebe iha prátika, sei la permiti ba ita alkansa fim ida, ne’ebe iha termu real kria deit tan problema entre nasaun rua.

Se deklarasaun polítika husi Dr. Mari ne’e, ne’ebe hau foi dehan dadaun, la ajuda deputadu husi Bankada Fretilin loke sira nia vizaun kona-ba Estadu, hau sei forsadu, tanba amizade no tanba solidariedade demokrátika, hau repete fali, hau sei forsadu atu dehan ba Sekretáriu-Jerál husi imi nia Partido, katak presiza renova Partidu ne’e.

PARTE II
Krime Grave - Justisa ka Amnistia?

Deputadu rekerente sira hakerek hanesan ne’e iha Mosaun Sensura: ‘A libertação de Maternus Bere hetan rekoñesimentu ... hanesan desizaun politika ida...’. Mai liu tan: ‘Maternus Bere, líder milísia Laksaur, responsável ba masakre Suai ne’ebe besik ema 200 mak mate... hetan libertasaun...’

Dokumentu ne’e mos hatoo hanesan ne’e: ‘Situasaun aktual tenki haree iha kontestu ida ne’ebe luan liu husi vontade Governu no husi Prezidente Repúblika hodi aprezenta proposta amnistia ida ba krime hotu-hotu ne’ebe hala’o iha Timor-Leste entre 1974 até ohin loron’.

Kuandu, liuba, dehan katak deputadu rekerente sira sai konfuzu, ne’e tanba tuir termu rasiosíniu, buat n’e kontradiz.

Iha enkontru ho bankada ne’ebe reprezenta iha Parlamentu, husi Lejislatura atual, ne’ebe Prezidente Repúblika konvika, ita nia Xefe estadu entrega esbosu ida no hatete: ‘Desizaun iha ita boot sira nia liman, iha Parlamentu Nasional. Se Partidu sira konsidera katak ne’e asuntu ho interese nasional, entau diskuti ba. Fretilin konkorda, fo ba Partidu seluk atu desidi mos. Maibe se hanoin katak asuntu ida ne’e laiha importánsia, hau , nu’udar Prezidente Repúblika, sei la fo presaun ba ema ida’. Nune’e mak Prezidente PSD no sei hanesan Deputadu, Eng.º. Mário Carrascalão, mak sujere katak, invésde 1999 ba 2006, tansa mak la desde 1974.

Atu laiha dúvida, hau relata fali, ba entrevista ne’ebe fo mai hau iha 12 de Juñu 2003, ba Lusa husi Primeiru-Ministru iha tempu ne’eba, Dr. Mari Alkatiri: ‘Fo ba Parlamento atu desidi kona-ba amnistia ne’ebe hau hanoin hanesan solusaun únika ba problema. Ne’e hanesan kestaun ida ne’ebe merese debate nasional ida iha Timor-Leste.’ Ba liu tan, o Dr. Mari afirma: ‘Hau hanoin katak debate ne’e tenki analiza política tomak relativamente ba kestaun ( justisa). Hanesan sidadaun no hanesan primeiru-ministru hau sei ba defende iha amnistia iha debate ida ne’e tanba hau hanoin katak  justisa hala’o tiha ona no no tenki lori ema hirak ne’e fila hika ba sosiedade’.

Karísimu Deputadu

Objetivu CAVR nian mak saida? Atu produz lista ida kona-ba kriminozu no fó ba tribunal? Saida mak hakarak, nu’udar Estadu? Justisa? No se justisa, justisa ida ne’ebe? Mata ba matan, nehan ba nehan... ka... Justisa ho ita nia liman rasik? No justisa ne’e ba sé? Ba jeneral indonezia sira no sira deit? Ka mos milísia deit mak tenki hetan kastigu? 

Justisa vale deit hanesan justisa, se aplika ba kazu 1999? No kazu seluk antesde 1999 bele ema haluha deit?

Nosaun justisa nian ne’ebe relasiona ho timoroan  mak saida? Partidu politiku sira laiha buat ida atu hatan? UDT? Fretilin rasik? No partidu sira seluk ne’ebe asina integrasaun hodi halo invazaun no okupasaun? Ka rezultadu CAVR nian la vale? Ka rekomendasaun husi CAVR laiha sentidu?

Deputadu rekerente sira husi Fretilin sala hotu kedas, bainhira afirma katak ‘vontade Governo nian... atu aprezenta  proposta amnistia ida’, tanba nunka iha okaziaun ruma, hanesan Xefi Governu, hau deklara katak hau nia Governu sei ba hola inisiativa hanesan ne’e. 

Partidu ne’ebe kompoen AMP laiha interese espesial ida ba Lei  Amnistia. Husi partidu 5, só ASDT mak iha memória ba partisipasaun iha desde 1974. Nein PD, nein PSD, ne’ebe mai deit husi Asembleia Konstituinte no menus liu tan UNDERTIM no CNRT até só mosu iha oras eleisaun 2007.

Se mak iha interese iha lei amnistia ida, husi parte Partidu Governu nian? Vontade sa, iha termu manaan nian, iha termu benefísiu, mak Governu ida ne’e bele hetan, formadu deit husi Partidu ne’ebe la envolve diretamente iha direktamente iha oho ema husi 1974 no 1975, hodi aprezenta proposta Lei Amnistia ida? Enkuantu hanesan Partidu, nein ida!

- Nein Partido ida husi AMP, portantu husi Governu ne’ebe hau lidera, mak  responsabiliza ba violensia no oho ema, ne’ebe hala’o husi Abril 1974 ba Agostu 1975!

- Nein Partidu ida husi AMP mak envolve iha funu sivil ne’ebe akontese iha 1975!

-Nein Partidu ida husi AMP, mak responsabiliza ba masakre iha Aileu no Same, iha Dezembru 1975!

- Laiha Partidu ida husi AMP mak sei responsabiliza ba prizaun, tortura dezumana ba Fransico Xavier Amaral no ba ezekusaun ema inosente barak, mak akontese iha 1977! 

- Laiha Partidu husi AMP mak sei responsabiliza ba kuadru rezistensia seluk, sivil no militar sira, durante hanesan Baze ba Apoiu!

Ne’eduni, koalia kona-ba “vontade Governu nian” ate pareseke sira hakarak fo hatene katak Partidu sira, mak konstitui IV Governu Konstitusional, iha krime atu rezolve tuir justisa nian! 

I, karisimu deputadu sira, ha’u mak koalia – Kay Rala Xanana Gusmao! Ha’u uluk membru Komité Sentral Fretilin, desde 1975 to’o 1986, hala’o funu ida, ne’ebé imi barak seidauk iha responsabilidade iha imi nia kabaz, mak agora dadauk  imi nia responsabilidade boot mak fiskaliza aktu governu nian.   

Iha Dezembru 1986, ha’u haruka mensajen ba liur, ba kamarada sira iha liur, atu rekoñese, tanba ha’u nia dever moral no polítiku, katak ami, timoroan sira, mos komete krime! Ha’u tenke dehan... ema barak mak la konkorda ida ne’e! 

Dehan iha Konferénsia Fretilin ba dahuluk, iha Maiu 2000, iha Jináziu, katak ha’u asume, hamutuk ho ha’u nia kamarada husi Fretilin, salah hotu ne’ebé komete to’o Dezembru 1986.  No katak timoroan sira hotu bele deskansa tanba, husi 1987 to’o 1999, tanba ha’u mak lidera luta ne’e, ha’u asumi krimi hotu mak komete husi CNRM, husi CNRT no husi FALINTIL.  Ha’u hein katak meritisimu Juiz Suai nian rona hela ha’u, ba atu fihar katak nia bele fo valor ba desizaun Estadu ne’ebé Tribunal Distrital sei foti.

Maibe ba tal proposta ba lei amnestia, husi 1974, mak nein afekta buat ida husi Partidu AMP, tenke haree hanesan aktu polítiku Estadu nian. Proposta ida husi Lei Amnistia , husi 1974, implika rekoñesimentu ba krime, “krime funu” balun, konvensionadu ba Krime Grave! 

Maibé, agora mak kazu Martenus Bere hanesan konsideradu asuntu nasional relevante, ida ne’e mak Bankada Fretilin aseita katak lei aministia ida la ba kontra husi konseitu justisa Fretilin nian?  

Aministia signifika aktu polítiku, nunka husi Tribunal, atu perdoa krime ida.  Tanba sá ita tenke perdoa krime ida? Iha ne’ebé nosaun Jusitisa ida ne’e? – ida ne’e pergunta mak dokumentu ba Mosaun Sensura subentende ba nia espiritu. Tanba deputadu rekerente sira hatene ke ha’u la hasai Martenus Bere hodi ba halo nia mout fali iha tasi.

Karik ‘desizaun Governu hodi manda hasai husi prizaun Becora, Sr Martenus Bere hanesan afronta klaru ida ba Konstituisaun RDTL no Lei iha vigor’, ha’u sei hakfodak bele hasoru krime boot ne’ebe komete 1974, ba ita nia Konstituisaun, karik kualker bankada iha Parlamentu tenta atu avansa ho proposta ba lei amnestia.  Ha’u ba aviza ona ha’u nia Partidu, CNRT, hodi evita hasoru Konstituisaun RDTL no poupa traballu Fretilin.

Tanba sá, señor deputadu sira, ha’u tenta imajina pandemoniu juridiku no legal kestaun!  Artigu 161 husi Konstituisaun RDTL hakerek hela (oh deskulpa, Konsitutuisaun la hakerek, deputadu rekerentes Fretilin 6, no mos ema seluk mak hakerek Konstituisaun), mak dehan hanesan ne’e:

‘aktu kometidu entre 25 Abril 1974 no 31 Dezembru 1999 mak bele konsidera krime kontra umanidade, ba jenesidiu ka funu mak pasiveis ba prosedimentu kriminal hamutuk husi tribunal nasional no internasional’.

Ne’eduni, bainhira simu, hare se perspektiva seluk pozitivu liu, karik Fretilin konkorda ho proposta ba Lei, Fretilin sei mosu hanesan la konsistente ho sira nia valor ba justisa.  Dilema boot ba konsiénsia! 

Kariu Lei ne’e liu no promulgada no Tribunal Rekursu taka matan, bainhira Lei ne’e vigora, Parlamentu interfere iha kompeténsia Tribunal nian, tanba so desizaun Tribunal nian mak desizaun Estadu, hanesan lee iha dokumentu mosaun.  Parlamentu ba kazu ida ne’e, bele legaliza hela buat ilegal, hodi lejitima buat inkonstitusional ida.

Hare katak bainhira iha lei ida hodi legaliza buat ilegal, mak agora laiha tan violasaun ba prinsípiu? Iha kazu ida ne’e, karik Fretilin partisipa ba aprovasaun ba Lei Amnistia ida, bele husu tanba sá no ba sá ba buat ne’e hotu, ho relasaun ba Martenus Bere, mak hanesan orgullosu tanba agora nia sai “asuntu relevante ba interese nasional” Timor-Leste nian?

Ita tenke hanoin katak atu aprezenta proposta lei nian, katak deputadu Fretilin la asina, hafoin hetan aprovasaun husi maioria, husi AMP, no Fretilin foti inkonsituisionalidade lei nian, iha Tribunal Rekursu. No ha’u fihar ba independénsia Tribunal sira nian, Lei sei inkonstituisional no afronta sei hanesan tamañu krime mak halo desde Abril 1974. 

Ha’u dehan fila fali, Partidu AMP nian, bainhira hanesan Partidu, sei la lakon iha absolutu karik laiha Lei Amnistia ida ne’e, tanba nein ida hetan interveniente diretu iha krime, desde Abril 1974 to’o Dezembru 1999.

PARTE III
Instituisaun Estadu nian: legalidade no ilegalidade

Deputadu rekerente justifika mos Mosaun tuir termu hanesan ne’e: “Maternus Bere....hetan libertasaun ba aktu ida ne’ebé la judisial”. No “hasai Maternus Bere husi prizaun Becora sem aktu judisial”. No “desizaun Governu ---hanesan afronta klaru ida ba Konsitutisaun no leis iha vigor iha ita nia paiz. Ikus-liu, “se mak deside, nia halo ilegalmente”.  

Ita nia Estadu iha tinan 7 ba prosesu konstrusaun no Timor-Leste iha lista Estadu frajil no saida mak ha’u ba aprezenta mak situasaun real ba prosesu dezenvolvimentu iha ita nia Estadu nian.  

Ha’u iha obrigasaun atu halo ida ne’e, tanba sei hatan ba sasan loos mak sei la fo dalan ba oportuniszmu politiku ne’ebé iha responsabilidade ki’ik.

Ha’u agora ba tau imi apar ho kronolojia faktus:

- Maternus Bere tama legalmente iha 9 Agostu, ida ne’e hanesan, ho vistu entrada iha nia pasaporte. Iha salah husi parte ajénsia Governu nian;

- familiares vitima nian haree nia liu no baku nia – prinsípiu ba la admite halo justisa iha ita nia lima rasik

- Polítika evita at-liu no kaer nian, hatene ona saida mak sira atu trata, entrega ba justisa.  

- Tribunal Distrital Suai hahu prosesu no fo orden prizaun preventiva. 

Hetan deskoñesimentu klaru husi Regulamentu UNTAET no.2000/15 kona-ba “kriasaun ba kamaras ho juridisaun exkluziva no espesial kona-ba delitu graves”, ne’ebé harii jurisdisaun eskluziva no espesial, ho eskluzaun espresa husi Tribunal ne’ebé deit, no kompeténsia ida ne’e pertense ba Tribunal Distrital Dili nian no Tribunal Rekursu.  Kodigu Prosesu Penal, liu husi Dekretu-Lei no.13/2005, iha 1 Dezembru, salvagarda liu-liu rejime no hahu husi Regulamentu UNTAET 2000/15.

- Hotdi ba konkorda ho ha’u katak Tribunal Distrital Suai la fo orden ba prizaun Marternus Bere tanba nia hetan sona, ida ne’e hanesan irasional se ita hotu hanoin hanesan ne’e!!

No. 2 iha numeru artigu 30 husi Konstitusaun RDTL dehan katak “laiha ema ida ne’ebé deit mak bele hetan detensaun ka dadur se lae tuir termus espresamente previstu husi lei ne’ebé iha vigor”, sempre iha detensaun ka prizaun hatama ba apresizaun husi juiz kompetente tuir prazu legal.  Ida ne’e la akontese.

I, ne’eduni, hanesan kazu ba husu ba distintu deputadu Fretilin: Ikus-liu, se mak viola konstituisaun no lei iha vigor iha ita nia rai? Tanba deit desizaun mak Tribunal Distrital nian (mak la’os kompetente iha relasaun ba materia) bele konsidera ona...desizaun Estadu? No afronta mak Juiz Distrital halo ba Konstituisaun, ba Kodigu Penal no ba Regulamentu no. 2000/15, husi UNTAET?  Iha ne’e, ita tenki hotu haree ba independénsia Tribunal sira nian no separasaun poder nian? Tanba deit Estadu, ba ita, mak hanesan desizaun Tribunal? Mesmuke kompetente ka la kompetente?

   - Iha loron 26, bainhira ha’u iha enkontru hela ho Prezidente Parlamentu Nasional, Prezidente Repúblika koalia ho ha’u iha telefone, (no ha’u iha ne’e rasik, iha Salaun Nobre ida ne’e), no ha’u prontu atu hasoru Prezidente rua ne’e. Bainhira ha’u to’o iha ne’eba, PR koalia hela ho telefone ho Minsitru Hassan Wirajuda.

PR dehan ba ami depois katak ministru indonezia dere ba nia no halo apelu ba haree kazu Maternus Bere, husi espiritu komisaun Verdade no Amizade no katak salah ita nian, bainhira ita la impede nia bainhira nia tama iha TL.  CVA, iha nia rekomendasaun ida, surjere kordenasaun boot ida ba atividade iha fronteira, liu-liu ba materia ida ne’e.  Hassan Wirayuda apela ba ita nia Prezidente ba intersede, hamutuk ho instansias Estadu timoroan nian, kona­ba kazu ne’e.

   - Ho lamentasaun ba salah hodi bele fo vistu – no ida ne’e signfika katak ita seidauk halo prosesu ne’e hotu ba sensibilizasaun kona-ba rekomendasaun CVA nian – ha’u husu, ne’eduni, ba PR ba koalia ho Prokuradoria Jeral Republika, bainhira P-GR hatan ba PR. Razaun ba pedidu ida ne’e, husi ha’u nia parte, mak atu salva-guarda independénsia Instituisaun nian no evita interferensia husi parte Governu.

   - Tuir mai ha’u ko’alia ho Ministra Justisa kona-ba kazu ne’e, bainhira nia hetan informasaun uluk-liu mak tenta atu kontakta Advogadu Maternus Bere nian, defensor Públiku, ba haree vias legal di’ak ida ba rezolve kazu ne’e – Governu halo movimentasaun ona, sim, maibé ba fasilita prosesu ne’ebé lakoi interfere diretamente.;

   - Iha loron 28 Agostu, Señor Prezidente Repúblika, bainhira hetan kontaktu ho P-GR dere mai ha’u ba ko’alia ho Prokurador-Jeral Ajuntu no ba Prokurador Internasional sira, tuir rekomendasaun husi Dra. Ana Pessoa, ne’ebé iha hela iha Singapura.  Ha’u bolu lalais Dr Vicente, P-G Adjuntu, mos ho internasional nain rua,  Dr Arlindo Figueredo no Dr Luis Landim, no sira hotu fo garantia mai ha’u katak Prokuradoria la simplesmente envolve iha kazu ida ne’e.  Mesmu ke sira la koñese kazu ida ne’e, sira oferese fo tulun ba Advogadu Marternus Bere nian, bainhira buka via legal ida ne’ebé apropriadu ba rezolve problema ida ne’e. Entaun surjere katak Advogadu ne’e aprezenta rekerimentu ida ba Tribunal hodi husik sai tanba razaun saude.

   -Ministra Justisa oferese mos ba harii kontaktu entre Advogadu no Prokurador nain 3 ne’e.

   - iha loron 29, ami hetan koñesimentu katak Advogadu Marternu Bere nian halo ona rekerimentu ida no Tribunal apenas presiza deit konfirmasaun husi junta medika ida.  Bolu Ministru Saúde no nia prontu atu ajuda hodi buka solusaun ida.  Tanba razaun legalidade, ami foti hanesan ezemplu Sr Rogerio Lobato, ne’ebé III Governu Konstituisional oferese ba ami hanesan prenda, iha loron ne’ebé ami simu tomada de pose.   

   - Iha loron 30 Agostu, ha’u preokupa tanba falta informasaun kona-ba kazu ida ne’e, molok tuku 8, ha’u iha Palasiu Prezidente Repúblika.  Komandante-Jeral PNTL entaun, fo informasaun ba ha’u kona-ba falta progresu ba kazu ida ne’e, bainhira Juiz Tribunal Distrital Suai hetan difikuldade atu kontakta, tanba nia deside ba pasa fin-de-semana iha Oecusse.  

No ha’u fihar – hanesan ha’u hakarak fihar ba ema nia boa fe- katak Meritisimu Juiz Distrital tama husi Atambua no Kefa, tanba indoneziu sira la taka fronteira, so tanba deit ba asuntu interese nasional iha Timor-Leste.  No karik sira taka fronteira, tanba razaun interese nasional indonezia nian, ha’u laiha resposta ba ida ne’e.  Ba ita nia pedidu, durante krize, Estadu indoneziu simu taka fronteira, ba salvaguarda interese nasional Timor-Leste. 

   - Entretantu, ha’u simu telefone husi Ministru Zacarias, ne’ebé aguarda hela Ministru Hassan, iha aeroportu iha Dili, hodi informa ba ha’u preokupasaun husi Ministru Iindoneziu ba solusaun kona-ba kazu Maternus Bere ne’ebé seidauk iha.  Ha’u husu ba Komandante-Jeral PNTL, ba hetan ho kontaktu ho Ministra Lucia, ho Defensor-Jeral, Dr Sergio Hornai, n ho Prezidente internia husi Tribunal Rekursu, Dra Natercia.  Bainhira Prezidente interina husi Tribunal Rekursu no Ministra Justisa to’o, ami hala’o enkontru iha sala entrada Palasiu nian.

Dra Natercia dehan katak nia labele halo buat ida, tanba prosesu pertense ba Tribunal Distrital Suai. Ha’u dehan nesesidade ba haree ba problema, tuir termu politiku no la’os barak-liu ba termu legalista, maibé tanba dalan legal hanesan interditu, ami ramata ba lao ba oin no ami tur ho bainaka sira.

Ha’u hatene, iha ha’u nia laran, katak Prezidente Repúblika mos hein hela se ha’u bele dehan ba nian solusaun ruma, maibé tanba ha’u la hetan solusaun ruma no, ao kontrariu, ha’u hetan deit difikuldade tuir orden oin-oin, ha’u deside tuir silénsiu no ha’u tenta halo kontaktu ho PR.  

   - Iha ohin, ho konvidadu sira, ha’u simu telefonema seluk husi Ministru Zakarias, hodi informa mai ha’u katak Ministru Hassan halo kestaun ba mai deit, se ha’u iha garantia ba solusaun ba kazu ida ne’e.  Ministru Hassan fo hanoin fali ba boa-fe husi Estadu rua ne’e bainhira harii CVA no katak ba laiha solusaun ba kazu Marternu Bere bele afeta konfiansa iha relasaun entre paiz 2 no katak, husi ami nia la-koperasaun, husi materia husi karakter sensitivu ba Indonezia, Estadu Indonezia bele hetan obrigasaun atu haree fila-fali nia politika diplomatika ho relasaun ho Timor-leste.

   - Ha’u husu ba Prezidente interina husi Tribunal Rekursu, Meritisma Juiz Dra Natercia, ba halo reuniaun emerjénsia ida iha Sala de Espera Palasiu nian.  Ha’u bolu mos Ministra Justisa no Komandante-Jeral PNTL. 

Ha’u esplika ba sira katak ita presiza foti desizaun no tenke foti desizaun politika ida.  Ha’u husu no insisti hamutuk ho Prezidente interina Tribunal Rekursu ba tulun rezolve problema, ba haree tuir forma ida halo nu’usa ita sai husi situasaun ida ne’e.  Tanba ha’u koalia lian makaas, durante ita nia diskursaun, Dra Natercia dehan: “Primiru-Ministru, tempu funu liu tiha ona!. No ha’u hatan: “Sim, no tanba ida ne’e duni mak ha’u bolu imi hotu, ba ita hotu rezolve problema ida ne’e. Ami simu hotu mak absolutamentu nesesariu, haree ba faktor hotu, no ita labele sai deit pura no simplesmente legalistas. Ida ne’e halo parte polítika Estadu nian”. 

Ha’u entaun dirije ba Ministra Justisa no dehan ba haruka hasae Marternus Bere husi prizaun Becora. Ministra fo hanoin katak nia bele fo orden deit se nia iha autorizasaun husi Tribunal. Dra Natercia, apezar hodi insiste – no ha’u apresia nia konsistensia – katak tuir termus legais, nia labele halo buat ida, fo saida – no ha’u apresia tan ba pozisaun ida ne’e, ne’ebé nia bele kompriende ke devia duni iha fleksibilidade ida ba atuasaun mak prezerva sistema juridiku maibe hatan mos ba interese paiz – no fila ba Ministra Justisa no dehan: “Tanba prizaun iha ita boot nia responsabilidade, Ministra iha kompetensia hodi transfere Maternus ba fatin seluk , la’os iha Becora”.

Agradese ho ideia ida ne’e no ami hatene katak ita labele avansa barak ba kazu ida ne’e, ha’u fo orden ba Ministra Justisa ba hasai Marternus Bere husi Becora no transfere nia ba Embaixada Indonezia. Ministra lakoi, no ha’u dehan: “karik o la halo, ha’u rasik ba ne’eba noa hasai nian”. 

   - Ministra tama iha kontaktu ho Embaixada Indonezia no kombina ba Maternus Bere hodi ba ne’eba lalais, mas la fila ba Indonezia , hodi hein katak prosesu hotu tenke kompleta uluk.

   - Ministra mos dere Xefe Guarda Prizional, maibé bainhira polisia mosu iha Becora, ne’ebé laiha dokumentu husi Tribunal, Xefe Guarda Prizional la kumpre Ministra nia orden. No faktu ida ne’e merese rejista, husi profisionalismu mak nia hatudu.  Ha’u haruka Ministra transmite ba nia katak ha’u asumi responsabilidade, maibé nia tenki kumpre orden ida ne’e. NO ORDEN NE’E KUMPRE DUNI NO MARTERNUS BERE HETAN TRANSFERENSIA BA EMBAIXADA INDONEZIA IHA DILI. 

   - Molouk tuku meiu-dia, iha enkontru mak ha’u iha ho Ministru Hassan, ha’u dehan katak ha’u labele haruka Maternus Bere fila lalais, no nia, Hassan, tenke mos respeita sistema vijente iha paiz ne’ebé mane ne’e so bele fila bainhira prosesu ne’e ramata, no iha minimu respeita sistema separasaun poder.

   - Iha lokraik, serimónia ba medalla ne’ebe fó husi Prezidente Republika, Dra Natersia dehan mai ha’u: “Primeiru Ministru, ita ba iha problema. Aniseto hatene ida ne’e no nia ba foti kestaun iha Parlamentu”, ne’ebé ha’u hatan: “Dehan ba nian, halo ba!”. 

- Governu kontinua halo esforsu no iha loron 1 ka 2 Setembru, Dr Sergio Hornai, mosu, husi ami nia konvite, ba haree halo nu’usá prosesu junta médika ne’e hala’o, ezemplu ida, ha’u repete, hanesan Rogerio Lobato.

- Ami hetan hakfodak bainhira, Meritisimu Juiz Tribunal Distrital Suai haruka fo orden ba Komisariu Distrital UNPOL atu averigua kona-ba paradeiru Maternu Bere no ba kaptura fila fali ba prizaun Becora.  Ha’u hanoin katak Meritisimu Juiz tribunal Distrital Suai hanoin hanesan distintu deputadu Fretilin sira: “so desizaun tribunal kompetente ida deit ....mak bele konsidera desizaun Estadu”.

Ita nia Estadu, Estadu Timor-Leste, iha kestaun ida ne’e, iha ona enderesu ida – hela iha tribunal Distrital Suai nian! Ha’u la hatene mos tanba sa mak ita lakon tempu iha ne’e, iha Parlamentu ne’e, tanba ita nia Estadu iha Suai!.

- Iha loron 2 Setembru, Prezidente Republika konvoka Prezidente Parlamentu Nasional, Sekretariu-Jeral Fretilin, Dr Mari Alkatiri no ha’u rasik, ba ita ko’alia kestaun ida ne’e Maternus Bere. Sr Dr Marii Alkatiri, Sekretariu-Jeral Fretilin, dehan katak desizaun so bele deit politika. Dr Marii Alkatiri mos surjere junta medika ida, hanesan opsaun alternativa, ba fasilita prosesu soltura nian. Ha’u hato’o deskordansia, tanba ami tenta tiha ona ida ne’e, no la hetan rezultadu, tanba la iha vontade politika husi parte Justisa. 

- Individualidade sira hotu iha Dili, simu konvite ba serimonia iha loron 8 Setembru iha Suai, uluk-liu lorn 30 Agostu.

No jornalista Jill Jolife hakerek artigu ida iha Australia hodi afirma katak ha’u ba Suai loron 2 antes, atu konvense Bispu 2 ne’e ba muda selebrasaun ba loron 8, hodi hanesan ne’e labele koinside ho loron masakre, mak akontese iha loron 6.

Entaun duni, hau to’o deit iha Suai iha loron sorin deit iha loron 7, ha’u iha enkontru ida ho familiares vitima sira hodi esplika desizaun Estadu nian.  No sira hatudu maturidade no sira ezije deit ba Governu atu hadi’ak estrada, fo bee no eletrisidade, hadi’ak ponte, halo tan eskola no aumenta tan rezidensia medika.

I, ha’u bele dehan mos: bainhira halo inagurasaun ba monumentu ba vitima Suai, iha 4 Marsu 2003, ha’u iha ne’eba, hafoin ha’u tau aifunan no reza ba vitima sira....no ha’u la lembra haree deputadu sira nia oin ne’ebé foti mosaun ida ne’e.

- Iha 10 Setembru, komunikasaun sosial husu ha’u nia reasaun ba komunikadu imprensa ne’ebé Prezidente Tribunal Rekursu halo.  Kontrariu ho dokumentu ba mosaun sensura, ha’u la admite, tanba HAU ASUMI responsabilidade no ha’u hein atu hatan ba Tribunal Distrital Suai, ne’ebé ami nia Estadu hela, bainhira Meritisimu Juiz sei bolu ha’u.  Maibé karik Estadu muda tiha ona rezidensia ba Tribunal Rekursu, sei fasil liu ba ha’u , tanba ida ne’e besik liu.  

- Dokumentu ba Mosaun Sensura dehan: “Prezidente Konsellu superior Majistratura Judisial no Tribunal Rekursu Timor-Leste deside averigua ba “kazu Bere” ba verifika kazu hetan libertasaun ilegal ida, instaurasaun korespondente”. ba asaun penal ida no disiplinar  

Hanesan imi bele haree, ha’u konfuzu hela, no ha’u la hatene se Estadu ne’e kontinua hela iha Tribunal Distrital Suai ka transfere tiha ona ba Tribunal Rekursu, iha Dili.  Ha’u hakarak fihar, ha’u gosta fihar ba ema nia fe-di’ak, katak prosesu Marternus Bere  hetan tama ba Tribunal Rekursu, pelumenus iha loron 9 Setembru, loron komunikadu husi Prezidente Tribunal Rekursu. Ha’u aprende iha ailaran metodu ida: se mak lahatene prosesu ida, la iha direitu atu pronunsia. Ohin, ida ne’e sei dirije ha’u nia atuasaun.

I, ne’eduni, ba bele iha preparasaun iha asaun penal mak sei ba instaurada kontra ha’u, mak ha’u halo kronolojia faktus, hodi kobre mos frakezas husi instituisaun seluk iha prosesu konstrusaun Estadu.

Atu termina, Señor deputadu sira, ha’u hakarak afirma iha ne’e, katak IV Govenru Konstituisional, bainhira simu tomada-de-pose, fo prioridade boot ba sistema Justisa, iha Timor-Leste. Apezar de ba koloka ba fundus tan no aumenta rekursu umanu nasional no internsional, numeru kazu pendente kontinua boot nafatin hamutuk husi Prokuradoria-Jeral Republika. Numeru prizoneiru sira mak seidauk iha aprezentasaun ba Tribunal sei boot nafatin, bainhira ne’ebé barak bele inosente hela maibe kumpri hela pena prizaun molok sira hetan julgamentu. 

Ministeriu Justisa adopta lejislasaun fundamental no tau hela atensaun espesial ba kondisaun, material no umana, iha setor Tribunal.

So Governu ida ne’e deit, ne’ebé ha’u lidera, bele defende interese Estadu ida ne’e nian, hatan ba espetativa povu nian no dezenvolve paiz ne’e.

Obrigadu Barak!


Tuir mai, deputadu hatnulu resin fo sira nia komentariu no hanoin. Iha kalan, Primeiru Ministru kolia dala ida tan, no Fretilin fo encerramento.


Intervensaun Encerramentu Debate Mosaun Censura
Vice Xefe Bancada Fretilin, Francisco Branco

Senor PM, ita labele lori komplexidade diplomasia nian atu mai justifika ita bo’ot nia desizaun nebe viola konstituisaun.

Kronologia nebe PM aprezenta durante minutu 90 nia laran, perante Plenarinia Uma Fukun Povo nian ida ne’e, so mai deit soe rai-rahun ba povo nia matan.

Klaru tebes duni depois de rona tia intervensaun hosi PM, nebe hatudu klaru atentadu sistematiku kontra ita nia konstituisaun – Lei Inan Republika ida ne’e nian.

Hahu kedas PM nia intervensaun, senor PM viola regras nebe PN estabelese tia ona liu hosi reuniaun lideres bankadas, nebe aprova guiaun nebe orienta debate ida ne’e, nebe mos hetan prezensa hosi membru Governu, maibe PM viola tia guiaun ne’e, hanesan biasa ona, viola regras legais iha estadu ida ne’e.

Laos primeira vez ita bo’ot PM, interfere ba kompetensia sistema justisa nian, hodi viola separasaun poderes, viola esensia demokrasia, maibe ida ne’e akontese barak no sistematika ona, ida maka libertasaun estudante sunu uma eskola Bekora.

Ami konsidera materia mosaun sensura ne’e problema interese nasional, laos tamba meramente problema MB. Problema ne’e interese nasional, tanba intervensaun V. Excelensia PM, iha kompetensia tribunal nian, nebe viola separasaun poderes nebe sai nudar esensia demokrasia nebe TL kaer, no viola konstituisaun republika. Tanba ne’e, bankada rua iha asentu iha PN halo mosaun sensura ba PM tuir regras konstituisaun.

Sr Presidente

Estabilidade no interese nasional ne’e buat ida nebe importante tebes. Maibe eskperiensia mos hatudu tia ona katak ema hanesan Suhartu, Markus, Pinochet mos dala barak koalia ba interese nasional no estabilidade nasional. Maibe realidade hatudu katak sira nia interese rasik maka iha karik iha “instabilidade “ nia laran

Kestaun hanesan laos primeira vez maka TL enfrenta, uluk iha 2003 ita hotu sei hanoin, kazu Atsabe nebe iha infiltrasaun milisia. Ita estadu TL bele resolve.

Tanba ne’e maka ami la simu no la konkorda bainhira balu hateten katak mosaun sensura ne’e atu mai deit provoka instabilidade.

Ami kaer nafatin ba deklarasaun Bispu Bazilio katak la fiar, katak MB atu mai kria instabilidade iha rai ida ne’e iha nia relasionamentu TL – RI,. hodi mai estraga prestigiu no dignidade Estadu Indonesio nian. Ami la fiar,.hanesan Bispu Bazilio mos la fiar.

Politika rekonsiliasaun nebe TL halao ho RI mai ,hosi konsensus nasional nebe parte hotu hotu defende. Politika rekonsiliasaun ne’e lao ho diak hosi parte rua ne’e, kaer ba ida idak nia baze legal – Lei Inan. Tanba atu halao politika rekonsiliasaun ka politika nebe deit ba estadu, senor PM laos bele viola konsituisaun, Ne’e lalo’os.

Sr Presidente

Transferensia nebe ita bo’ot Senor PM deklara halo ba MB, ne’e illegal, tanba transferensia ne’e so bele halao bainhira transferensia ne’e halao hosi prizaun ida ba prizaun ida seluk, no transferensia ne’e so bele halo hosi juiz nebe iha kompetensia iha materia. Tanba Embaixada laos estabelesimentu prizional hanesan Deputada Fernanda Borges hateten.

Embaixada ne’e territorio nasaun ida seluk nian. Tanba ne’e MB hetan estatutu foun. Sai hosi detensaun prizaun preventiva ba estatutu foun, nebe livre, hosi transferensia ida nebe ita bo’ot halo ba nia.

Importante duni dezenvolvimentu nasional, maibe importante liu maka ita  nudar Estadu Direitu tenki tau iha leten Konstituisaun no Lei, bainhira halo lalaok hotu iha nasaun ida ne’e nia laran.

Ita bo’t deklara ona katak asume responsabilidade ba desizaun ida ne’e, tanba ne’e , atu remata ami hakarak deklara, Senor PM Ita Bo’ot nudar uluk hanesan komandante bo’ot no lider nasional resistensia timorense, nebe sempre fo’o ezemplu diak ba ema hotu hotu nebe partisipa iha resistensia nasional hodi halo tuir.

Tanba ne’e momentu to’o duni ona atu Ita bo’ot, reasume prinsipios sira ne’e, ho koragem rezigna-aan hosi kargu PM. Hodi nune’e ita bo’ot fo’o ezemplu diak, hodi hanorin gerasaun foin sae nasaun ida ne’e nian , hanesan mos Sekretariu Geral Partidu Fretilin Mari Alkatiri hatudu tia ona iha 2006, bainhira ita bo’ot rasik nudar PR egizi nia rezigna-aan, maske ho alegasaun hosi media internasional deit.

Ho ida nune’e, ita bo’ot sei la husik ita bo’ot nia maioria Deputadus iha uma fukun Povo nian ida ne’e, hodi vota, la tuir sira nia konsiensia rasik no kontra konstituisaun republika demokratika Timor Leste. Obrigado wain.

 

The Timor-Leste Institute for Development Monitoring and Analysis (La’o Hamutuk)
Institutu Timor-Leste ba Analiza no Monitor ba Dezenvolvimentu
Rua dos Martires da Patria, Bebora, Dili, Timor-Leste
P.O. Box 340, Dili, Timor-Leste
Tel: +670-3321040 or +670-77234330
email: 
info@laohamutuk.org    Web: http://www.laohamutuk.org    Blog: laohamutuk.blogspot.com