Lao Hamutuk

Bulletin  |  Surat Popular  |  Topic index  |  Reports & Announcements  |  Updates
Reference  |   Presentations  |  Mission Statement  |  LH Blog  |  Search  |  Home

Kazu Krimes Graves Timor Leste & Tribunal Kriminal Internasional (ICC)

Hakerek Nain: Timotio de Deus,S.H., Observador Lei Timor Oan
25 Setembru 2009

Artigu ida ne'e publika ona iha Timor Post (1-3 Okt. 2009) no Tempo Semanal (28 Set. no 5 Okt. 2009)

Click here for information about Maternus Bere's arrest and release, and the reaction to it.  Also Tetum

Belun lee nain sira. Ba edisaun ohin, hau hakarak fahe ho ita boot sira informasaun ruma konaba Estatuta Roma ba Tribunal Kriminal Internasional neebe Estadu RDTL ratifika tiha ona iha loron 6 Setembru 2002. Opiniaun Legal nee nuudar analiza legal ba Estatuta Roma neebe Estadu Timor Leste ratifika ona. Opiniaun Legal ida nee, haree husi perspektiva lei nian deit no la impede ezijensias ema barak nian konaba estabelesimentu tribunal internasional ba kazu krimes graves Timor Leste nian. Opiniaun legal nee nuudar informasaun Legal Publiku atu ema hotu-hotu bele hatene no koese.

Diak, belun lee nain sira, tuir mai, hau hakarak levanta kestoins ruma relasiona ho Estatuta Roma ba Tribunal Kriminal Internasional neebe durante nee ema barak levanta.

Saida maka Tribunal Kriminal Internasional? Tribunal Kriminal Internasional ida nee nia jurisdiksaun ba iha kazus saida deit? Tanba sa maka ema timor oan barak hakarak ezije tribunal ida nee atu harii iha Timor Leste? Saida maka naran jurisdiksaun teritorial, jurisdiksaun temporal no prinsipiu komplementariu neebe regula iha lei internasional nee? Oinsa konaba Amnestia tuir Estatuta Roma nee? Se maka bele halo kapturasaun no investigasaun ba suspeitu sira? Suspeitu ida oinsa maka bele lori ba prosesa iha Tribunal Kriminal Internasional nee? Bele ka lae kazu krimes graves Timor leste nian neebe akontese iha 1975-1999 nee refere ba prosesa iha Tribunal Kriminal Internasional nee? Tuir mai, hau sei hatoo informasaun ruma relasiona ho kestoins hirak nee bazeia ba Estatuta Roma ba Tribunal Kriminal Internasional.

1. Saida maka Tribunal Kriminal Internasional?

Tribunal Kriminal Internasional nee nuudar tribunal permanente ida no iha poder atu prosekuta individuais ba krime genosidiu, krime kontra umanidade, krime funu, no krimes agresoins (maske ba momentu ida nee Tribunal nee seidauk halao nia jurisdiksaun ba krime agresaun (Artigu 1 no 5 Estatuta Roma).

Tribunal ida nee hahuu funsiona iha loron 1 Jullu 2002. Loron ida nee maka nuudar loron neebe Estatuta Roma ba Tribunal Kriminal Internasional tama iha vigor (artigu 11.1). Tuir Estatuta Roma nee, atu bele prosekuta deit krimes neebe kometidu iha loron ou depois de loron ida nee. Signifika krimes graves neebe akontese antes de Estatuta Roma nee tama iha vigor, sei la tama iha jurisdiksaun Tribunal Internasional nee nian tanba Tribunal nee sei la halao nia jurisdiksaun ho retroativa. Tribunal nee agora dadaun provizoriamente nia baze sei iha Hague, Netherlands (Olanda) (artigu 3.1). Maske nia baze iha Hague maibe nia jurisdiksaun bele kobre fatin neebe deit.

Too Setembru 2009, iha ona nasaun 109 maka sai membru ba Tribunal ida nee. Signifika nasaun hirak nee asina no ratifika ona Estatua Roma nee. The Czech Republic ratifika ona Estatuta nee iha loron 21 Jullu 2009 no sei sai hanesan membru ba 110 iha loron 1 Outubru 2009. No iha nasaun hamutuk 38 maka asina tiha ona Estatuta Roma nee maibe sira seidauk ratifika. Iha nasaun barak, inklui China, India, Russia no Estadus Unidus Amerika seidauk hakarak atu sai membru ba tribunal ida nee (www.icc-cpi.int) ho sira nia razoins oioin.

Tribunal Kriminal Internasional nee bele jeralmente halao nia jurisdiksaun ba suspeitus husi nasional Estadu Parte, krime neebe alegadu akontese iha teritoriu estadu membru nee, ou iha situasaun neebe refere ba tribunal nee mai husi Konsellu Seguransa Nasoins Unidas nian (artigu 12-13 Estatuta Roma). Tribunal nee dezea hodi halo kompleta deit Sistema Judisiariu Nasional nian neebe eziste ona: Tribunal nee foin maka halao nia jurisdiksaun kuandu tribunal nasional nee laiha ona vontade ou labele atu investiga ou prosekuta krimes neebe akontese (artigu 17 no 20 Estatuta Roma). Needuni, responsabilidade primeiru atu investiga no kondena krimes nee entrega ba estadu parte invididual maka halao (www.icc-cpi.int).

Too ohin loron, Tribunal ida nee loke ona investigasaun ba situasoins haat: Northern Uganda, Republika Demokratika Kongo, Republika Afrikanu Sentral no Darfur. Tribunal ida nee indika ona ema nain sanulu-resin-haat; sira nain hitu sei libre, sira nain rua mate tiha ona, sira nain lima seluk oras nee dadaun iha kustodiu. Tribunal Kriminal Internasional nee nia julgamentu primeiru, halao ba Thomas Lubanga Lider Milisia ema Kongo hahuu iha loron 26 Janeiru 2009 (www.icc-cpi.int).

2. Tribunal Kriminal Internasional ida nee nia jurisdiksaun ba iha kazu sa deit?

Artigu 5 husi Estatuta Roma nee estabelese Tribunal nee nia jurisdiksaun ba iha grupus krimes haat, hanesan krimes graves barak neebe komunidade internasional preokupa: Krimes Jenosidiu, Krimes kontra umanidade, krimes funu, no krimes agresaun. Iha Estatuta Roma nia laran defini ona ho klaru konaba krimes hirak nee, esetu konaba krimes agressaun maka seidauk defini klaru. Lei nee fornese katak Tribunal nee seidauk bele halao nia jurisdiksaun ba iha krime agresaun too iha tempu neebe estadus partes konkorda ona konaba definisaun ba krime ida nee no estabelese kondisoins neebe bele prosekuta (artigu 2-3 Estatuta Roma).

3. Saida maka naran jurisdiksaun teritorial, jurisdiksaun temporal no prinsipiu komplementariu neebe regula iha lei internasional nee?

Jurisdiksaun Teritorial. Durante negosiasaun neebe lidera ba Estatuta Roma, estadus partes barak maka argumenta katak Tribunal nee tenke hetan autorizasaun atu bele ezerse jurisdiksaun universal. Maibe proposta nee la passa tanba opozisaun husi Estadus Unidus (www.icc-cpi.int). Kompromisu ida neebe maka atinje iha momentu neeba maka autoriza tribunal nee atu ezerse nia jurisdiksaun tuir sirkumstansias limitada maka tuir mai nee:

  • Ema nee akuzadu ba komete krime ida nee nia nasional maka estadu parte (ou ema nee nia estadu simu tiha ona jurisdiksaun tribunal nee nian;
  • Krime neebe alegadu kometidu iha teritoriu estadu parte nee nian (ou iha Estadu seluk nia teritoriu neebe ema suspeitu nee komete krime simu tiha ona jurisdiksaun tribunal nee nian); ou
  • Iha situasaun ida neebe refere ba tribunal nee husi Konsellu Seguransa Nasoins Unidas nian.

Jurisdiksaun temporal. Jurisdiksaun Tribunal nee la aplika retroativamente: Nia so bele halo prosekusaun/prosekuta krimes neebe kometidu iha loron ou depois de loron 1 Jullu 2002 ( Loron neebe Estatuta Roma tama iha vigor). Kuandu Estadu ida sai parte ba Estatuta Roma depois de loron nee, Tribunal nee bele ezerse nia jurisdiksaun automatikamente ba krimes neebe kometidu depois de Estatuta Roma nee tama iha vigor ba estadu ida nee (artigu 24 Estatuta Roma).

Prinsipiu Komplementariu. Tribunal Kriminal Internasional nee intende hanesan opsaun ida neebe ikus, investigasaun no prosekusaun foin maka halao wainhira Tribunal Nasional falla. Artigu 17 Estatutu nee fornese katak kazu ida inadmisivel / la permite kuandu:

  1. Kazu ida nee investiga dadaun hela husi estadu ou prosekuta hela husi estadu neebe iha jurisdiksaun ba iha kazu nee, esetu estadu nee laiha vontade ou labele legitimamente halao investigasaun ou prosekusaun;
  2. Kazu nee investiga ona husi estadu neebe iha jurisdiksaun ba kazu nee no estadu nee deside tiha ona atu la prosekuta ema nee, esetu desizaun nee rezulta husi laiha hakarak/laiha vontade ou laiha kapasidade husi Estadu parte nee legitimamente atu prosekuta;
  3. Ema nee hetan tiha ona julgamentu ba konduta neebe sujetu husi ema neebe hatoo keixa, no julgamentu husi tribunal nee la permitidu tuir artigu 20, paragrafu 3;
  4. Kazu ida nia gravidade la sufisiente hodi justifika liutan asaun husi Tribunal.

Artigu 20 neebe regula konaba prinsipiu nebis in idem, paragrafu 3, espesifika katak, ema ida hetan tiha ona julgamentu husi tribunal seluk, Tribunal Kriminal Internasional labele julga fila fali ba konduta neebe hanesan esetu prosedimentus iha tribunal seluk nee:

  • ho propozitu/objetivu atu defende ou proteje ema nee husi responsabilidade kriminal ba krimes neebe tama iha jurisdiksaun tribunal nian;
  • oinseluk, labele halao nia knaar ho independentemente ou imparsialmente tuir prosesus normas neebe lei internasional rekoese no halao ho maneira neebe, iha sirkumstansias, la konsistente ho intensaun ida atu lori ema nee ba justisa.

4. Tanba sa maka ema timor oan barak hakarak ezije tribunal ida nee atu harii iha Timor Leste?

Durante Okupasaun Republika Indonesia nian iha Timor Leste, hahuu husi tinan 1975-1999 rezulta ema timor oan barak teb-tebes maka mate ona no barak teb-tebes maka terus tanba hetan tortura husi militar Indonezia sira no iha ema timor oan barak teb-tebes maka sai sobreviventes too agora. Ema barak maka tenke sai faluk, balun sai orfanatus no balun sai sobreviventes, tanba kauza husi atuasoins krimes husi militar Indonesia no milisias timor oan sira neebe hetan suporta husi governu Indonesia hodi komete krimes graves hirak nee. Tanba nee vitimas sobreviventes, orfanatus no faluk sira ou sira nia reprezentantes sira ejize atu kazus krimes graves Timor Leste nian nee tenke lori ba Tribunal Internasional ou Tribunal Nasional hanesan konsagra ona iha artigu 160 Konstituisaun RDTL atu bele buka justisa neebe justu ba sira nia kazus hirak neebe akontese no rezulta sira sai vitimas husi atuasoins hirak nee.

5. Oinsa konaba Amnestia tuir Estatuta Roma nee?

Nasoins Unidas no Komunidade Internasional Kruz Vermella mantein sira nia pozisaun katak fo amnestia ba ema akuzadus ba krime funu no krimes graves sira seluk nee nuudar violasaun ba Lei Internasional. Hau hanoin ema timor oan hotu, liu-liu ema vitimas subreviventes, orfanatus no faluk sira husi kazu krimes graves Timor Leste nian sei sente fuan kanek kuandu ema akuzadus ba krimes graves sira hetan amnestia. Graas a Deus, too momentu ida nee, iha Timor Leste, ita seidauk rona katak ema akuzadus ba krimes graves hetan ona amnestia husi estadu Timor Leste. Iha 2008, Estadu Timor Leste liu husi Prezidente Republika fo ona Indultu ba ema kondenadus ba krimes graves iha 1999. Maibe amnestia ita seidauk rona. Nunee, Timor Oan hotu-hotu bele fiar katak ema kriminozu ba krimes graves iha Timor Leste sei la hetan amnestia husi orgaun kompetentes iha Timor Leste. Hau hanoin korajem ida nee defisil atu enfrenta realidade maibe kuandu ema hotu sai unidus no forte hodi kontra desizaun lideransa politikus sira neebe kontrariu ho vontade popular nian, kontrariu ho Konstituisaun hanesan lei inan, neneik ka kleur ema barak sei hetan duni justisa nee tuir saida maka konsagra ona iha leis domestikas no leis internasional sira neebe Estadu RDTL adopta ona.

6. Se maka bele halo kapturasaun no investigasaun ba suspeitus ba kazu krimes graves?

Iha artigu 59.1 Estatuta Roma neebe regula konaba Prosedimentus Kapturasaun iha Kustodial Estadu, hateten: Estadu Parte neebe simu ona pedidu ba kapturasaun provizional (ba suspeitu/a) ou ba kapturasaun no rende imediatamente tenke hola kedan medidas hodi kaptura ema neebe alegadu tuir nia leis rasik no tuir provizaun parte 9 Estatuta Roma konaba elementus krimes. Entaun, tuir paragrafu ida nee, define klaru ona katak Estadu parte Estatuta Roma maka tenke halo kapturasaun ba ema alegadu / akuzadu ida kuandu hetan notifikasaun ou simu pedidu ruma husi Tribunal Kriminal Internasional neebe oras nee dadaun baze iha Hague - Netherlands. Estatuta Roma nee la temi konaba Polisia Internasional maibe temi deit estadu parte. Nunee, se ita koalia konaba kontestu Timor Leste nian, entaun PNTL maka halo kapturasaun ba ema akuzadu / alegadu ida wainhira Estadu Timor Leste simu ona notifikasaun ou pedidu kapturasaun husi Tribunal Kriminal Internasional. Saida maka akontese kuandu Estadu Parte nee simu ona pedidu kapturasaun nee husi tribunal maibe ema akuzadu nee la hela iha rai laran? Kooperasaun bilateral entre estadu parte ida ho estadu parte seluk liu husi tratadu extradisaun nee ajuda teb-tebes atu bele fasilita prosesu kapturasaun ba ema akuzadu nee, nunee mos bele fasilita prosesu justisa ba ema alegadu nee. Oinsa konaba papel Polisia Internasional nian iha kazus hanesan nee? Tuir hau nia hanoin, wainhira iha estadu rua maka iha ona akordu extradisaun ou sai ona membru ba Polisia Internasional nian, Polisia Internasional nia papel importante teb-tebes atu bele ajuda detekta no halo kapturasaun ba ema neebe hetan pedidu husi Tribunal atu bele halo kapturasaun kuandu ema suspeitu nee la hela iha rai laran. Konserteza, prosesu kapturasaun ba ema ida tenke kumpri ou halo tuir mos padraun internasional nian konaba oinsa halo kapturasaun ba ema alegadu ou akuzadu ida.

7. Suspeitu ida oinsa maka bele lori ba prosesa iha Tribunal Kriminal Internasional nee?

Ema neebe sai suspeitu ba kazu krimes graves hanesan Krime Jenosidiu, krimes kontra umanidade, krime funu no krime agresaun hanesan regula ona iha artigu 5 Estatuta Roma ba Tribunal Kriminal Internasional. Krimes neebe la tama iha kategoria krimes graves neebe regula iha estatuta nee, neebe la tama iha jurisdiksaun tribunal kriminal internasional nee sei laiha posibilidade atu lori ba julga iha tribunal internasional nee.

8. Bele ka lae kazu Timor Leste nian neebe akontese iha 1975-1999 nee refere ba prosesa iha Tribunal Internasional nee?

Estatuta Roma ba Tribunal Kriminal Internasional nee hahuu adopta iha loron 17 Jullu 1998 no tama iha vigor iha loron 01 Jullu 2002. Tuir artigu 11 husi Estatuta nee neebe regula konaba jurisdiksaun ratione temporis regula katak Tribunal Kriminal Internasional nee halao nia jurisdiksaun ba deit iha kazu krimes graves neebe akontese iha loron ou depois de Estatuta Roma nee tama iha vigor.Ba estadu neebe sai membru ba Tribunal Kriminal Internasional nee iha loron neebe estatuta roma nee tama iha vigor ou depois de tama iha vigor Tribunal Kriminal Internasional (ICC) nee sei halao nia jurisdiksaun automatikamente hodi halo prosesu judisial ba krimes neebe akontese iha loron ou depois de Estatuta Roma tama iha vigor iha estadu parte nia teritoriu. Maibe krimes graves neebe akontese iha estadu parte nia teritoriu maibe krimes nee akontese tiha antes de Estatuta Roma tama iha vigor, Estatuta Roma nee sei la aplika retroativamente.

Timor Leste ratifika ICC nee iha loron 6 Setembru 2002. ICC hahuu tama iha vigor iha loron 1 Jullu 2002. Kazu Krimes graves Timor Leste nian nee akontese antes loron 1 Jullu 2002. Entaun tuir prinsipiu jurisdiksaun Temporal Tribunal nee sei la halao nia jurisdiksaun retroativamente (artigu 24 Estatuta Roma).Artigu 22 .1 Estatuta Roma regula konaba prinsipiu nullum crimen sine lege- signifikasaun husi prinsipiu nee atu dehan deit katak atuasaun krime nee konstitui tiha ona iha lei antes atuasaun krime nee akontese no kazu krime nee tama iha jurisdiksaun tribunal nee nian. Atuasaun krime neebe akontese antes lei nee tama iha vigor, ema suspeitu nee sei laiha responsabilidade kriminal tuir Estatuta Roma nee (Ita boot sira bele refere mos ba artigu 31 Konstituisaun RDTL konaba aplikasaun lei kriminal). Nunee mos artigu 23 Estatuta Roma neebe regula konaba prinsipiu nulla poena sine lege. Tuir prinsipiu nee Tribunal bele kondena ema ida bazeia deit ba Estatuta Roma nee. Entaun tuir estatuta Roma nee, Tribunal Kriminal Internasional nia iha deit jurisdiksaun no iha poder atu bele julga deit kazu krimes graves neebe akontese iha loron Estatuta Roma nee tama iha vigor ou depois. Tribunal nee nia jurisdiksaun la kobre krimes neebe akontese antes lei nee tama iha vigor. Entaun kazu krimes graves Timor Leste nian nee sei labele / laiha posibilidade atu refere ba prosesa iha tribunal kirminal internasional tanba Estatuta Roma nee la fo dalan. Tanba Estadu Timor Leste sai estadu parte ba ICC depois de Lei Kriminal Internasional nee tama iha vigor, nunee mos Estatuta Roma nee tama iha vigor iha loron 1 Jullu 2002.

Purtantu, Tribunal Internasional ida oinsa maka ita hakarak atu haraii iha Timor Leste? Tribunal Ad hoc hanesan iha 2001 harii iha Jakarta? Ou Pael Espesial ba Krimes Graves (SPSC) neebe harii iha Timor Leste iha tinan 2000-2005 iha Timor Leste? Se harii tribunal Ad hoc hanesan ida neebe uluk harii iha Jakarta iha 2001, hatudu tiha ona nia rezultadu neebe la positivu. Ita tenke rekoese katak ho servisu SPSC nee nian iha momentu neeba konsege julga ona kazus krimes graves lubun boot ida ( ita boot sira bele refere ba Relatoriu JSMP nian konaba SPSC neebe lansa iha 2006 / www.jsmp.minihub.org ba informasaun kompletu) maibe kazus barak maka husik hela too agora. Pael Espesial nee tenke remata sira nia knar tanba sira nia mandatu remata no mos orsamentu neebe atu suporta sira nia knaar mos la too / hotu ona. Entaun laiha possibilidade ba sira atu bele extende sira nia mandatu. Iha parte seluk, ita nia governu hanesan laiha vontade politika ida hodi fo resposta ida neebe positivu ba harii tribunal internasional ida iha Timor Leste. Iha fatin seluk, maske iha artigu 69 Konstituisaun RDTL regula ona konaba separasaun poder entre orgaun soveranu sira, maibe ita nia lideransa politikus husi orgaun soveranu balun la fo atensaun ba saida maka konsagra ona iha Konstituisaun/la kumpri prinsipiu separasaun poder nee, no halao fali orgaun soveranu seluk nia knar hanesan saida maka Tribunal ( Orgaun Judisiariu) Timor Leste enfrenta dadaun ba oras ida nee. Entaun, iha possibilidade ka lae atu harii tribunal internasional ida ba kazu krimes graves Timor Leste nian? Depende ba vontade politika Governu RDTL nian hodi lobby ho ONU konaba asuntu ida nee.
 

The Timor-Leste Institute for Development Monitoring and Analysis (Lao Hamutuk)
Institutu Timor-Leste ba Analiza no Monitor ba Dezenvolvimentu
Rua dos Martires da Patria, Bebora, Dili, Timor-Leste
P.O. Box 340, Dili, Timor-Leste
Tel: +670-3321040 or +670-77234330
email: 
info@laohamutuk.org    Web: http://www.laohamutuk.org    Blog: laohamutuk.blogspot.com